نیٹو ممالک کے خلاف روس کے کسی بھی اقدام کا جواب دیں گے: بائیڈن

🗓️ 14 مارچ 2022

سچ خبریں:امریکی صدر نے کہا کہ ان کا ملک ماسکو کی جانب سے نیٹو کے رکن ممالک کے خلاف کسی بھی اقدام کا جواب دے گا اور یہ عالمی جنگ کا باعث بنے گا۔
امریکی صدر جو بائیڈن نےاپنے ایک بیان میں کہا کہ ہم اپنے شراکت داروں کے ساتھ کھڑے رہیں گے اور یہ واضح پیغام دے رہے ہیں کہ ہم نیٹو کی سرزمین کا ہر قیمت پر دفاع کریں گے، بائیڈن نے مزید کہا کہ اسی لیے میں نے 12000 فوجی لٹویا، ایسٹونیا اور رومانیہ کو روسی سرحد پر بھیجے ہیں۔

انہوں نے کہا کہ اگر نیٹو ممالک کی طرف کوئی پیش قدمی ہوتی ہے تو میں اس بات کی ضمانت دیتا ہوں کہ ہم جواب دیں گے جو تیسری عالمی جنگ ہو گی، اس کے لیے ہمارا ایک مقدس عہد ہے،یادرہے کہ اس سے قبل امریکی صدر نے یوکرین میں روس کے خصوصی فوجی آپریشن کے آغاز پر اپنے خطاب میں کہا تھا کہ امریکہ نیٹو کی سرزمین کا ہر قیمت پر دفاع کرے گا۔

درایں اثنا پینٹاگون کے ایک عہدہ دار نے بھی یوکرائن کے صدر اور دیگر یوکرائنی حکام کی طرف سے اس ملک میں نو فلائی زون کا اعلان کرنے کی بار بار کی درخواستوں کا جواب دیتے ہوئے کہا کہ نو فلائی زون کے اعلان کا مطلب روس اور نیٹو کے درمیان تصادم ہو گاجو نیٹو اور یوکرین کے مفاد میں نہیں۔