غزہ کی جنگ نے اسرائیل کا حقیقی چہرہ بے نقاب کر دیا

 غزہ کی جنگ نے اسرائیل کا حقیقی چہرہ بے نقاب کر دیا

سعودی روزنامہ الریاض نے اپنی تازہ رپورٹ میں کہا ہے کہ غزہ پر اسرائیلی حملوں نے اس نقاب کو ہٹا دیا ہے جس کے پیچھے تل ابیب طویل عرصے سے خود کو دنیا کے سامنے ایک جمہوری ریاست کے طور پر پیش کرتا رہا۔

رپورٹ میں واضح کیا گیا کہ نہتے فلسطینیوں کے خلاف قتل و غارت، جبری ہجرت اور وسیع تباہی نے عالمی رائے عامہ کو جھنجھوڑ دیا ہے، اور یہی وجہ ہے کہ اسرائیل کو ملنے والی عالمی حمایت میں تیزی سے کمی آ رہی ہے۔

اخبار کے مطابق، اسرائیل نے مغرب کو ہمیشہ یہ تاثر دیا کہ وہ مشرق وسطیٰ کی واحد جمہوریت ہے اور خطے کے خطرات سے دنیا کو بچا رہا ہے، مگر غزہ کی جنگ نے ثابت کر دیا کہ اسرائیل نہ تو جمہوری اقدار کا علمبردار ہے اور نہ ہی انسانی و اخلاقی اصولوں پر عمل پیرا، بلکہ ایک قابض طاقت ہے جو کھلے عام جرائم کا ارتکاب کر رہی ہے۔

الریاض نے مزید لکھا کہ آج دنیا کے کئی ممالک فلسطین کو تسلیم کرنے کی جانب بڑھ رہے ہیں اور اسرائیل کے خلاف عالمی موقف پہلے سے کہیں زیادہ سخت ہو چکا ہے۔

رپورٹ میں سابق امریکی صدر ڈونلڈ ٹرمپ کے اس اعتراف کا بھی ذکر کیا گیا جس میں انہوں نے کہا تھا کہ غزہ کی جنگ اسرائیل کی ساکھ کے لیے نقصان دہ ہے۔ ان کے بقول اسرائیل ممکن ہے جنگ جیت جائے، لیکن اپنی عالمی حیثیت اور بالخصوص امریکی کانگریس میں اثر و رسوخ کھو دے گا۔الریاض نے نتیجہ اخذ کیا کہ یہ اعتراف اس بات کا ثبوت ہے کہ اسرائیل کی نام نہاد جمہوریت کا پردہ فاش ہو چکا ہے اور اب دنیا اس کے حقیقی چہرے کو دیکھ رہی ہے۔