عرب لیگ کا مسجد الاقصی کے ساتھ اظہار یکجہتی

🗓️ 22 اگست 2022

سچ خبریں:عرب لیگ نے فلسطینیوں اور مسجد الاقصی کے ساتھ اپنی مکمل یکجہتی کا اظہار کیا ہے۔
مرکزاطلاعات فلسطین کے مطابق عرب لیگ کے سیکرٹریٹ نے مسجد اقصیٰ اور شہر قدس کی تاریخی اور قانونی حیثیت میں کسی بھی قسم کی تبدیلی کے خطرات کے خلاف خبردار کیا ہے،یاد رہے کہ اتوار کو انتہاپسند صیہونیوں کے ہاتھوں مسجد الاقصی کو نذر آتش کرنے کی 53ویں سالگرہ کے موقع پر ایک بیان میں اس اتحاد نے القدس کے خلاف صہیونی دشمن کے مسلسل حملوں اور جارحیت کے خلاف خبردار کرتے ہوئے کہا یہ حکومت 1948 سے آج تک فلسطینی قوم کے خلاف اپنے جرائم کو جاری رکھے ہوئے ہے اور القدس شہر کی شناخت کو نشانہ بنا رہی ہے نیز مسجد الاقصی پر روزانہ حملوں اور گرفتاریوں کے ذریعے اس شہر کو یہودی بنانے کی کوشش کر رہی ہے۔

عرب لیگ نے فلسطینی قوم کے ساتھ اپنی مکمل یکجہتی اور القدس شہر کے رہنے والے نوجوانوں کی استقامت کی حمایت پر زور دیا،اس یونین نے عالمی برادری سے مطالبہ کیا کہ وہ اپنی ذمہ داریاں پوری کرے، فلسطینی قوم کی حمایت کریں اور غاصب حکومت کی حیثیت سے صیہونی حکومت کو جارحیت روکنے اور ان تمام اقدامات کو منسوخ کرنے پر مجبور کریں جو مسجد اقصیٰ اور اس شہر کی تاریخی اور قانونی حیثیت کو تبدیل کرنے کا باعث بن سکتے ہیں۔