سچ خبریں:عراقی قومی سلامتی کونسل کے مشیر نے نیٹو افواج کے سربراہ سے کہا کہ ہم کسی دوسرے ملک پر حملہ کرنے کے لیے اپنے ملک کو استعمال کرنے کی اجازت ہرگز نہیں دیں گے۔
سومریہ نیوز چینل کی رپورٹ کے مطابق عراق کی قومی سکیورٹی کے مشیر قاسم الاعرجی نے اپنے ملک میں نیٹو کے سینئر کمانڈر مائیکل انکر سے ملاقات کے دوروان کہا کہ بغداد اس بات کو ہرگز قبول نہیں کرے گا کہ اس کی فضائی، زمینی اور آبی سرحدوں کو استعمال کرکے کسی دوسرے ملک پر حملہ کیا جائے،رپورٹ کے مطابق اس ملاقات میں دونوں فریق نے علاقے میں امن و استحکام کے قیام اور تعاون کے راستوں کو مضبوط کرنے نیز مشاورتی اور ٹریننگ کے بارے میں نیٹو کی حمایت کے موضوع پر گفتگو کی۔
عراقی قومی سلامتی کونسل کے مشیر قاسم الاعرجی کا کہنا تھا کہ عراق کی حفاظت اور اس کو ہر طرح کی علاقائی جنگ سے دور رکھنا ہماری ذمہ داری ہے، اسی لئے ہم کبھی بھی اس بات کی اجازت نہیں دیں گے کہ ہمارے ملک کی سرزمین کو کسی دوسرے ملک پر حملے کے لئے استعمال کیا جائے۔
واضح رہے کہ اس سے قبل بھی عراق کے قومی سلامتی کونسل کے مشیر قاسم الاعرجی اور مائیکل انکر نے گزشتہ 1 دسمبر کو ملاقات کی تھی اور دو طرفہ تعاون میں توسیع اور عراقی سکیورٹی اہلکاروں کی ٹریننگ اور ان کو مضبوط کرنے کے موضوع پر تبادلہ خیال کیا تھا۔
انہوں نے کہا کہ عراقی حکومت اپنے ملک سے تمام غیر ملکی فوجیوں کے انخلا پر مبنی پارلیمنٹ کی قرارداد کے نافذ ہونے پر تاکید کرتی ہے، قاسم الاعرجی کا کہنا تھا کہ عراقی سکیورٹی اہلکاروں نے بہت زیادہ تجربات حاصل کر لئے ہیں اور وہ داعش سے جنگ کی توانائی نیز ملک کو دہشت گردوں سے پاک کرنے کی طاقت رکھتے ہیں لہذا اب ہمیں غیر ملکی فوج کی کوئی ضرورت نہیں۔
