سچ خبریں:فلسطین کی اسلامی مزاحمتی تحریک حماس نے صیہونیوں کے ہاتھوں مسجد الاقصی کی لگاتار بے حرمتی پر قابضین کو انتباہ دیتے ہوئے کہا کہ مزاحمتی تحریک صیہونیوں کے اس طرح کے اشتعال انگیز منصوبوں کو کامیاب نہیں ہونے دے گی۔
فلسطین کی اسلامی مزاحمتی تحریک حماس کے قدس کے امور کے سربراہ ہارون ناصر الدین نے ایک بیان میں کہا ہے کہ مسلمانوں کے قبلہ اول مسجد الاقصیٰ پر غاصب صیہونی حکومت کے فوجیوں اور صیہونی انتہا پسندوں کی جارحیت کے انتہائی خطرناک نتائج برآمد ہوں گے۔
حماس کے رہنما ہارون ناصر الدین نے سخت متنبہ کیا ہے کہ صیہونی انتہا پسندوں کی جانب سے مسجد الاقصیٰ کو مسلسل جارحیت کا نشانہ بنایا جا رہا ہے جو ایک ایسا خطرناک اقدام ہے جس کے نتائج کی ساری ذمہ داری غاصب صیہونی حکومت پر عائد ہوگی، انہوں نے کہا کہ غاصب صیہونیوں نے مسجد الاقصیٰ کے خلاف اشتعال انگیزی تیز کر کے اس مقدس مقام کی بے حرمتی اور اسے جارحیت کا نشانہ بنانے کا عمل مزید تیز کر دیا ہے۔
ناصر الدین نے کہا کہ فلسطینی مجاہدین مسلمانوں کے قبلۂ اول کے خلاف غاصب صیہونی حکومت کا کوئی منصوبہ کامیاب نہیں ہونے دیں گے اور فلسطینیوں کی استقامت و مزاحمت صیہونی دشمنوں کو ناکوں چنے چبوانے مجبور کر دے گی۔
واضح رہے کہ غاصب صیہونی حکومت مسجد الاقصی کا اسلامی تشخص ختم کرنے کی کوشش کرتی رہی ہے جبکہ فلسطینی نوجوانوں کی استقامت و مزاحمت کی بنا پر اس سلسلے میں اس کی اب تک کوئی بھی سازش کامیاب نہیں ہو سکی ہے،درایں اثنا فلسطینی گروہوں نے تمام فلسطینیوں سے اپیل کی ہے کہ وہ مسجد الاقصیٰ میں اپنی موجودگی مسلسل بڑھاتے رہیں تاکہ غاصب صیہونی حکومت کا کوئی بھی منصوبہ کامیاب نہ ہو سکے۔