سوڈان میں وسیع مظاہرے، 92 افراد زخمی

🗓️ 22 فروری 2022

سچ خبریں:سوڈان میں ہونے والے مظاہروں میں خرطوم، بحری اور ام درمان شہروں میں 92 افراد زخمی ہوئے۔
القدس العربی نیوز ویب سائٹ کے مطابق، سوڈانی معالجین کی کمیٹی نے ایک بیان میں اعلان کیا کہ اس ملک میں بڑے پیمانے پر ہونے والے مظاہروں میں 92 افراد زخمی ہوئے، بیان میں مزید کہا گیا کہ سوڈان کے دارالحکومت خرطوم میں 71 افراد، شمالی شہر بحری میں 18 جبکہ خرطوم کےمغرب میں واقع شہرام درمان میں تین افراد زخمی ہوئے۔

یادرہے کہ اتوار کے روز، ہزاروں سوڈانی مظاہرین نے خرطوم، بحری اور ام درمان اضلاع میں بڑے پیمانے پر مظاہرے کیے، جن میں عوامی حکومت، سیاسی قیدیوں کی رہائی اور مظاہرین کے قتل کے ذمہ داروں کو سزا دینے کا مطالبہ کیا گیا،واضح رہے کہ سوڈان کی گورننگ کونسل کے چیئرمین اور اس ملک کی مسلح افواج کے کمانڈر انچیف عبدالفتاح البرہان نے حال ہی میں اعلان کیا کہ اگر انتخابات یا قومی اتفاق رائے ہو گیا تو فوج سیاسی میدان چھوڑ دے گی۔

البرہان نے یہ کہتے ہوئے کہ فوج 1998 کے وسط میں انتخابات کے انعقاد کے لیے پرعزم ہے اور عبوری مدت میں توسیع کی کوئی خواہش نہیں رکھتی، زور دیا کہ اگر کوئی معاہدہ طے پا جاتا ہے تو عبوری دور پر بات کرنے کے لیے فوج تیار ہے ۔

قابل ذکر ہے کہ گزشتہ سال 25 اکتوبر سے سوڈان کے مختلف حصوں میں عوامی معاملات میں فوجی مداخلت کے خلاف مظاہرے تقریباً روزانہ ہی کیے جا رہے ہیں۔