حزب اللہ امام موسیٰ صدر کی تعلیمات پرعمل کرتے ہوئے صہیونی دشمن کا مقابلہ کرے گا

حزب اللہ امام موسیٰ صدر کی تعلیمات پرعمل کرتے ہوئے صہیونی دشمن کا مقابلہ کرے گا

لبنان کی پارلیمنٹ میں حزب اللہ کے رکن حسن عزالدین نے کہا ہے کہ موجودہ حالات میں امام موسیٰ صدر کے نظریات اور رہنمائی کی اشد ضرورت ہے تاکہ صہیونی دشمن اور لبنان کے اندرونی چیلنجوں کے مقابلے میں قومی وحدت اور مزاحمت کو مضبوط بنایا جا سکے۔

انہوں نے یہ بات صور میں منعقدہ امام موسیٰ صدر اور ان کے ساتھیوں کے اغوا کی برسی کی تقریب سے خطاب کرتے ہوئے کہی۔ عزالدین کے مطابق، امام موسیٰ صدر نے لبنان آکر سب سے پہلے شیعہ برادری کو اس کے شایانِ شان مقام پر واپس لانے کی کوشش کی اور اعلیٰ اسلامی شیعہ کونسل سمیت متعدد ادارے قائم کیے۔

انہوں نے کہا کہ امام موسیٰ صدر نے لبنانی عوام کو صہیونی خطرات سے آگاہ کیا اور بتایا کہ یہ دشمن عرب و مغربی قوتوں کی پشت پناہی سے خطے میں قابض ہے۔ اسی مقصد کے لیے انہوں نے مختلف مذاہب اور فرقوں پر مشتمل کمیٹی برائے حمایت جنوب تشکیل دی اور بعد میں حرکت المحرومین اور پھر مزاحمتی تنظیم امل کی بنیاد رکھی، جو پورے لبنان میں پھیلی۔

حزب اللہ کے اس رہنما نے کہا کہ امام موسیٰ صدر ہمیشہ زور دیتے تھے کہ تعلیم حاصل کرنا، اسلحہ اٹھانا اور تیاری کرنا قومی ذمہ داری ہے، کیونکہ وطن خطرے میں ہے۔‘‘ ان کے مطابق، آج بھی لبنان کے لیے یہی پیغام سب سے زیادہ اہم ہے، خاص طور پر اس وقت جب امریکی اور صہیونی دباؤ کے تحت مزاحمت کو غیر مسلح کرنے کی بات کی جا رہی ہے۔

عزالدین نے سوال اٹھایا کہ اگر مزاحمت واقعی ختم ہو چکی ہے جیسا کہ دشمن دعویٰ کرتا ہے، تو پھر امریکی کانگریس کے وفود اور حکومتی نمائندے مسلسل بیروت آکر مزاحمت کے ہتھیاروں پر کیوں اصرار کر رہے ہیں؟ ان کے بقول، اصل وجہ یہ ہے کہ دشمن جانتا ہے جب تک لبنان میں حقیقی قوت اور ارادہ موجود ہے، اسے اطمینان نہیں مل سکتا۔

انہوں نے کہا کہ صہیونی دشمن لبنان کے ساتھ وہی منصوبہ دہرانا چاہتا ہے جو شام میں کیا گیا، یعنی طاقت کے ڈھانچے کو ختم کر کے ملک کو جارحیت کے لیے بے بس کر دینا۔

حسن عزالدین نے دوٹوک کہا ہم اپنا اسلحہ کبھی نہیں ڈالیں گے، کیونکہ ہتھیاروں سے دستبرداری دراصل لبنان کو دشمن کے حوالے کرنے کے مترادف ہے۔