بنگلہ دیش میں روہنگیا مسلمانوں کے کیمپ میں خوفناک آتشزدگی

🗓️ 10 جنوری 2022

سچ خبریں:بنگلہ دیش میں روہنگیا مسلمانوں کے پناہ گزین کیمپ میں خوفناک آتشزدگی کے واقعہ کے نتیجہ میں ہزاروں روہنگیا مسلمان بے گھر ہوگئے۔
بنگلہ دیش اور میانمار کی سرحد پر واقع روہنگیا مسلمانوں کے کیمپ میں آگ لگنے سے قریب 1200 خیمے جل کر راکھ ہو گئے جس کے نتیجہ میں اس وقت 5000 سے زیادہ لوگوں کے پاس سر چھپانے کی جگہ نہیں ہے۔

ایک عینی شاہد کا کہنا ہے کہ آگ کو قابو میں کرنے کے لئے ضروری اسباب اس کیمپ کے لئے فراہم نہیں تھے،ان کا کہنا تھا کہ اس طرح کی آگ لگنے کے واقعات بہت پیش آتے ہیں لیکن اسے قابو میں کرنے کے لئے کسی بھی طرح کے اسباب مہیا نہیں ہیں۔

یادرہے کہ اسی طرح کا ایک واقعہ گزشتہ برس مارچ میں بنگلہ دیش کے جنوب مشرق میں واقع پناہ گزین کیمپ میں رونما ہوا تھا جس میں 15 روہنگیا مسلمان جھلس کر چل بسے تھے جبکہ قریب 50 ہزار افراد دربدر ہو گئے تھے۔

واضح رہے کہ نسل پرستی کا شکار روہنگیا مسلمان میانمار حکام، فوج اور انتہاپسندوں کی جانب سے بربریت کا شکار ہونے کے بعد لاکھوں کی تعداد میں اپنا گھر بار چھوڑنے پر مجبور ہوئے اور کچھ بنگلہ دیش میں اور کچھ دوسرے ممالک میں دربدر ہوئے جبکہ کوئی ان کا پرسان حال نہیں ہے اور نہ ہی عالمی براداری نے میانمار حکومت کے خلاف کوئی ٹھوس قدم اٹھایا ہے۔