برمنگھم پولیس کا اسرائیلی ٹیم کے مداحوں کے داخلے پر پابندی کا فیصلہ

برمنگھم پولیس کا اسرائیلی ٹیم کے مداحوں کے داخلے پر پابندی کا فیصلہ

برمنگھم پولیس کی جانب سے اسرائیلی فٹبال کلب مکابی تل ابیب کے مداحوں کو آسٹن ولا کے خلاف یورپا لیگ میچ میں شرکت سے روکنے کے فیصلے نے برطانیہ میں سیاسی اور کھیل حلقوں میں شدید بحث چھیڑ دی ہے۔

پولیس کے مطابق، یہ میچ جو آئندہ ماہ ویلا پارک اسٹیڈیم میں منعقد ہونا ہے، سیکیورٹی کے لحاظ سے انتہائی حساس قرار دیا گیا ہے۔ویسٹ مڈلینڈز پولیس نے اپنے بیان میں کہا کہ موجودہ سلامتی کی معلومات، ماضی میں پیش آئے جھگڑوں اور خطے کی کشیدہ صورتحال کو مدنظر رکھتے ہوئے فیصلہ کیا گیا کہ مکابی تل ابیب کے شائقین کو اسٹیڈیم میں داخلے کی اجازت نہیں دی جائے گی۔

یہ سفارش برمنگھم کی سیکیورٹی ایڈوائزری کمیٹی کے سامنے پیش کی گئی، جو شہر کی انتظامیہ، پولیس، فائر بریگیڈ اور طبی اداروں کے نمائندوں پر مشتمل ہے۔ کمیٹی نے جائزہ لینے کے بعد پولیس کی سفارش منظور کر لی۔

پولیس کے مطابق، اس اقدام کا مقصد کسی بھی ممکنہ جھگڑے یا ناخوشگوار واقعے کو روکنا اور تمام تماشائیوں کے لیے ایک محفوظ ماحول فراہم کرنا ہے۔آسٹن ولا کلب نے اس فیصلے پر ردعمل دیتے ہوئے کہا کہ وہ یوفا اور مقامی حکام کے ساتھ رابطے میں ہے تاکہ میچ کے لیے مناسب حفاظتی انتظامات کو یقینی بنایا جا سکے۔

دوسری جانب، برطانیہ کے وزیراعظم کئیر اسٹارمر نے کہا کہ پولیس کو یقینی بنانا چاہیے کہ تمام فٹبال شائقین بغیر خوف کے میچ دیکھ سکیں۔انہوں نے زور دیا کہ سیکیورٹی خدشات اپنی جگہ، مگر ایسے فیصلوں میں انصاف اور توازن کا پہلو بھی برقرار رہنا چاہیے۔

برمنگھم کے رکنِ پارلیمنٹ ایوب خان نے پولیس کے فیصلے کی حمایت کرتے ہوئے کہا کہ مشرقِ وسطیٰ کی موجودہ صورتحال کو دیکھتے ہوئے کسی بھی بڑے اجتماع میں تشدد کا خطرہ بڑھ سکتا ہے، اس لیے یہ فیصلہ عوامی مفاد میں ہے۔ان کا کہنا تھا کہ حساس حالات میں ذرا سی بدانتظامی خطرناک ثابت ہو سکتی ہے۔