امید ہے کہ مصر یمن کے خلاف کسی بھی معاندانہ کارروائی سے باز رہے گا:یمنی عہدیدار

?️ 22 دسمبر 2022

سچ خبریں:یمن کی نیشنل سالویشن گورنمنٹ میں نائب وزیر خارجہ نے اپنے ایک ٹویٹ میں مصر کی جانب سے بحیرہ احمر کے پانیوں میں امریکی اتحاد کی کمان سنبھالنے پر رد عمل کا اظہار کرتے ہوئے لکھا کہ وہ امید کرتے ہیں کہ یہ ملک اپنے آپ کو صنعاء کے خلاف کسی بھی مخالفانہ کارروائی سے دور رکھے گا۔

اسپوٹنک خبر رساں ایجنسی کی رپورٹ کے مطابق یمن کی نیشنل سالویشن گورنمنٹ میں نائب وزیر خارجہ حسین العزی نے لکھا کہ مجھے امید ہے کہ عزیز مصر صنعاء کے خلاف کسی بھی معاندانہ اقدام سے باز رہے گا، انہوں نے مزید کہا کہ ہم واضح طور پر کہتے ہیں کہ ہم مصر سے محبت کرتے ہیں اور نہیں چاہتے کہ اسے نقصان پہنچے لیکن ہم یہ بھی قبول نہیں کرتے کہ ہمارے پانی ہمارے لوگوں کے مفادات کو نقصان پہنچانے کی جگہ بن جائیں۔

العزی نے مزید کہا کہ ہم ان تمام لوگوں کا دل سے احترام کرتے ہیں جو یمن کا احترام کرتے ہیں اور ہم صرف ان لوگوں کو نقصان پہنچانا چاہتے ہیں جو یمن کو نقصان پہنچاتے ہیں،یاد رہے کہ ریاستہائے متحدہ نے اپریل 2022 میں اعلان کیا کہ بحیرہ احمر، خلیج عدن اور آبنائے باب المندب میں مشن انجام دینے کے لیے اس نے کمبائنڈ ٹاسک فورس 153 تشکیل دی ہے جو ایک کثیر القومی فوجی اتحاد ہے۔

یاد رہے کہ گزشتہ منگل کو مصری فوج کے ترجمان نے اعلان کیا تھا کہ انہوں نے بحیرہ احمر اور خلیج عدن میں ایک نیا بین الاقوامی مشن سنبھال لیا ہے،اس سلسلے میں یمن کی نیشنل سالویشن گورنمنٹ کے وزیر دفاع محمد ناصر العاطفی نے کہا کہ آبنائے باب المندب، خلیج عدن، بحیرہ عرب سے لے کر سقطری آرکیپیلاگو تک اور یمنی جزائر یمن کی سرزمین کا حصہ ہیں، جن پر اس ملک کی مکمل خودمختاری ہے۔

انہوں نے کہا کہ یمنی مسلح افواج نے قومی خودمختاری کی خلاف ورزی یا ملکی آبی حدود کے قریب آنے والے کسی بھی خطرے یا خلاف ورزی سے فیصلہ کن طور پر نمٹنے کے لیے تمام ضروری اقدامات کیے ہیں۔