افغانستان سے امریکی انخلا کے سلسلہ میں روس کا رد عمل

🗓️ 18 جون 2021

سچ خبریں:روسی صدر نے کہا کہ افغانستان کی صورتحال کو دیکھتے ہوئے ماسکو کے لئےاس ملک سےامریکی فوجیوں کا انخلاء بہت اہم ہے۔
اناطولیہ نیوز ایجنسی کی رپورٹ کے مطابق روسی صدر ولادیمیر پوتن نے جمعرات کی رات کہا تھا کہ ماسکو کے لئے افغانستان سے امریکی فوج کا انخلاء بہت اہمیت کا حامل ہے، پوتن نے ماسکو میں ایک تقریر میں کہا ہے کہ افغانستان کی تاجکستان کے ساتھ سرحد مشترکہ ہے ، جو روسی فوجی اڈے کی میزبانی کرتا ہے۔

روسی صدر نے کہا کہ امریکی فوجی افغانستان سے انخلا کر رہے ہیں جبکہ یہ ملک ہمارے بہت قریب ہے ، تاجکستان میں ہمارا ایک فوجی اڈہ ہے،پوتن نے کہا کہ خطے میں اپنے تعلقات کو کیسے منظم کریں اور خطے کی سلامتی کو کیسے یقینی بنائیں یہ ایک بہت ہی اہم عملی مسئلہ ہے،واضح رہے کہ پوتن ، جنہوں نے گذشتہ روز (بدھ کے روز) امریکی صدر جو بائیڈن سے طویل ملاقات کی تھی ، نے کہا کہ انہوں نے افغانستان سے امریکی فوجیوں کے انخلا کے بارے میں بات چیت کی ہے۔

انہوں نے اپنی تقریر کے ایک اور حصے میں اپنے امریکی ہم منصب کو "پیشہ ور” قرار دیتے ہوئے کہا کہ روس کو ان کے ساتھ بہت احتیاط سے کام کرنا چاہئے تاکہ کسی بھی چیز کو نظرانداز نہ کیا جائے،پوتن نے کہا کہ جب تک امریکی چاہیں گے ہم ان مذاکرات کو جاری رکھنے کے لئے تیار رہیں گے، انہوں نے مزید کہا کہ بدھ کے روز بائیڈن کے ساتھ ان کی ملاقات اہم تھی کیونکہ جب لوگ بات نہیں کرتے ہیں تو مزید دعوے اور خدشات پائے جاتے ہیں جن میں سے بہت سارے دعوے ایسے ہوتے ہیں جن کا کوئی خارجی وجود نہیں ہوتاہے۔