نوشین شاہ نے اپنے مداحوں سے کیا اپیل کی ہے؟

?️ 27 جون 2024

سچ خبریں: پاکستانی شوبز انڈسٹری کی معروف اداکارہ نوشین شاہ نے مداحوں سے دعاؤں کی درخواست کی ہے۔

نوشین شاہ نے اپنے آفیشل انسٹاگرام ہینڈل پر ایک مختصر ویڈیو پوسٹ کی جس میں وہ گاڑی میں بیٹھے ہوئے ہیں، عبایا اور حجاب پہنے ہوئے ہیں۔

یہ بھی پڑھیں: 3 برسوں سے پابندی سے نماز پڑھ رہی ہوں:نوشین شاہ

اداکارہ نے اپنی انسٹاگرام اسٹوری میں مداحوں کے نام پیغام میں کہا کہ میری تمام مداحوں سے درخواست ہے کہ براہ کرم میرے لیے دعا کریں۔

انہوں نے بتایا کہ وہ شدید ڈپریشن اور انزائٹی کا شکار ہیں اور اس مشکل وقت میں انہیں آپ سب کی دعاؤں کی ضرورت ہے۔

نوشین شاہ کی انسٹاگرام اسٹوری تیزی سے سوشل میڈیا کے مختلف پیجز پر وائرل ہو رہی ہے اور مداح ان کے لیے دعائیہ پیغامات بھیج رہے ہیں۔ دوسری جانب، نوشین شاہ نے اپنے انسٹاگرام ہینڈل سے تمام پوسٹس ڈیلیٹ کر دی ہیں اور اب ان کے اکاؤنٹ پر صرف 22 پوسٹس موجود ہیں۔

ان 22 پوسٹس میں کچھ تصاویر نوشین شاہ کی ہیں جن میں انہوں نے حجاب پہنا ہوا ہے، جبکہ کچھ تصاویر ان کے بھائی کی ہیں، اس کے علاوہ چند پوسٹس اسلامی مواد پر مبنی ہیں۔

مزید پڑھیں: منال خان کی جسامت پر تنقید کرنے والوں کو نوشین شاہ کا کرارا جواب

واضح رہے کہ نوشین شاہ نے اپنی انسٹاگرام اسٹوری میں یہ نہیں بتایا کہ وہ کس وجہ سے ذہنی تناؤ کا شکار ہوئیں اور نہ ہی یہ وجہ سامنے آئی ہے کہ انہوں نے اپنی تمام تصاویر کیوں ڈیلیٹ کیں۔