عامر خان نے میرے ٹی وی پروگرام سے متاثر ہوکر شو شروع کیا، حنا خواجہ بیات

🗓️ 13 جنوری 2025

کراچی: (سچ خبریں) معروف اداکارہ و ٹی وی میزبان حنا خواجہ بیات نے دعویٰ کیا ہے کہ ماضی میں ان کے ٹی وی پروگرام سے متاثر ہوکر بولی وڈ مسٹر پرفیکشنسٹ عامر خان نے اپنا ٹی وی شو شروع کیا۔

حنا خواجہ بیات نے حال ہی میں 365 نیوز کے پروگرام میں شرکت کی، جہاں انہوں نے اپنے کیریئر سمیت دیگر معاملات پر کھل کر بات کی۔

پروگرام میں بات کرتے ہوئے انہوں نے بتایا کہ انہوں نے بطور صحافی اور ٹی وی میزبان کیریئر شروع کیا تھا۔

ان کا کہنا تھا کہ انہیں پہلے دن سے ہی احساس تھا کہ انہیں اداکاری نہیں کرنی اور نہ ہی انہیں اداکاری کا شوق تھا لیکن بعد میں صحافت اور میزبانی کرتے کرتے انہوں نے اداکاری بھی شروع کردی۔

اداکارہ کے مطابق انہیں ٹیلی وژن پر لانے والی پروڈیوسر سیما طاہر تھیں، جنہوں نے ان سے میزبانی کروائی جب کہ سلطانہ صدیقی نے ان سے اداکاری کروائی۔

حنا خواجہ بیات کا کہنا تھا کہ انہوں نے ’جھمکا جان‘ نامی ہم ٹی وی کے ڈرامے سے اداکاری شروع کی اور پھر وہ مسلسل اداکاری کرتی رہیں۔

پروگرام کے دوران انہوں نے بات کرتے ہوئے بتایا کہ اداکاری سے قبل وہ ٹی وی میزبانی کیا کرتی تھیں اور ان کے ٹی وی شوز اپنے زمانے کے مقبول ترین شوز تھے۔

ان کے مطابق انہوں نے ہی پہلی بار ٹی وی پروگراموں میں ذہنی صحت پر بات کرنا شروع کی اور اس وقت ایسے موضوعات پر ٹی وی پروگرامات کرنے کا خیال بھی نہیں تھا۔

انہوں نے بتایا کہ انہوں نے سوچا کہ ایسا پروگرام شروع کیا جانا چاہیے، جہاں اس بات پر بحث ہو اور لوگوں کی حوصلہ افزائی کی جائے کہ جب بھی کوئی مسئلہ ہو تو اس پر بات کریں، لوگوں سے مدد مانگی، ذہنی صحت کو ترجیح دی۔

حنا خواجہ بیات کے مطابق انہوں نے جیو ٹی وی پر اپنے شو کا سیٹ اور پروگرام تیار کیا اور پھر اسے نشر کیا، جسے بہت پسند کیا گیا۔

اداکارہ کا کہنا تھا کہ کافی عرصے بعد کسی نے انہیں بولی وڈ اداکار عامر خان کے ٹی وی شو کا کلپ بھیجا اور کہا کہ یہ آپ کے پروگرام کی کاپی ہے۔

حنا خواجہ بیات نے کہا کہ وہ عامر خان کے ٹی وی پروگرام کو اپنے پروگرام کی کاپی نہیں کہیں گی، البتہ بولی وڈ اداکار نے ان کے پروگرام سے متاثر ہوکر اپنا شو بنایا۔