افریقہ میں ایٹمی توانائی کی دوڑ, کون سے ممالک آگے ہیں؟

افریقہ میں ایٹمی توانائی کی دوڑ, کون سے ممالک آگے ہیں؟

تہران – افریقہ میں بجلی کی شدید قلت کے باعث کئی ممالک نے ایٹمی توانائی کو ایک اسٹریٹجک آپشن کے طور پر اپنانے کی کوششیں تیز کر دی ہیں۔ موجودہ وقت میں اس براعظم کی نصف سے زائد آبادی بجلی سے محروم ہے، اور تقریباً 20 افریقی ممالک ایٹمی ٹیکنالوجی کو توانائی، ماحولیاتی تحفظ اور معاشی پائیداری کے لیے حل کے طور پر دیکھ رہے ہیں۔

اب تک حقیقی پیش رفت محدود ہے اور صرف چند ممالک نے عملی طور پر ایٹمی توانائی کے منصوبوں پر ٹھوس اقدامات کیے ہیں۔ جنوبی افریقہ واحد ملک ہے جس کے پاس فعال ایٹمی پاور پلانٹ موجود ہے، جبکہ مصر سب سے زیادہ تیزی سے آگے بڑھ رہا ہے۔

مصر روسی کمپنی روس اٹم کے تعاون سے الضبعة نیوکلیئر پاور پلانٹ تعمیر کر رہا ہے، جس میں چار ری ایکٹرز کے ذریعے 4800 میگاواٹ بجلی پیدا کرنے کی صلاحیت ہوگی۔ یہ منصوبہ 30 ارب ڈالر کی لاگت سے مکمل ہو رہا ہے، جس میں سے 25 ارب ڈالر روسی قرض سے فراہم کیے گئے ہیں۔ توقع ہے کہ پہلا ری ایکٹر 2028 تک کام شروع کر دے گا۔اس کے علاوہ، غانا، کینیا اور نائیجیریا بھی ایٹمی توانائی کے منصوبوں کے لیے تیاری کر رہے ہیں اور ابتدائی معاہدوں اور فنی منصوبہ بندی پر کام جاری ہے۔

بین الاقوامی ایٹمی توانائی ایجنسی (IAEA) کے مطابق مراکش، الجزائر، روانڈا، تیونس، ایتھوپیا، سنگال، نائیجر، سوڈان، یوگنڈا اور زامبیا ابتدائی فیزیبلٹی اسٹڈی کے مرحلے میں ہیں۔

جبکہ برکینافاسو، آئیوری کوسٹ، ٹوگو، گنی، جبوتی، تنزانیہ، مڈغاسکر، نامیبیا اور زمبابوے ابھی ابتدائی تیاری کے مرحلے سے بھی پیچھے ہیں۔

افریقہ میں ایٹمی توانائی کی بڑھتی دلچسپی نے بڑی بین الاقوامی کمپنیوں کو اپنی طرف متوجہ کیا ہے، جن میں فرانسیسی کمپنی EDF، جنوبی کوریائی KEPCO، روسی روس اٹم اور چین کی نیشنل نیوکلیئر کارپوریشن شامل ہیں۔

عالمی سطح پر بھی حالیہ برسوں میں ایٹمی منصوبوں میں تیزی آئی ہے۔ صرف پچھلے پانچ سالوں میں دنیا بھر میں 40 نئے ری ایکٹرز کے منصوبے شروع ہوئے ہیں، جن میں سب سے زیادہ چین میں 26، پاکستان میں ایک اور باقی 13 مصر، بھارت، ترکی اور روس میں زیر تعمیر ہیں۔