وزیر اعظم کا فلسطین کے حوالے سے عالمی برادری سے مطالبہ

?️ 27 جولائی 2024

سچ خبریں: وزیرِ اعظم شہباز شریف نے خان یونس میں اسرائیلی فورسز کی پُرتشدد کارروائیوں کی سخت مذمت کرتے ہوئے کہا ہے کہ فلسطین میں انسانی بحران پیدا ہو چکا ہے اور اقوام متحدہ سمیت عالمی برادری کو اپنی ذمہ داریاں پوری کرنی چاہئیں۔

اپنے ایک بیان میں وزیرِ اعظم شہباز شریف نے کہا کہ خان یونس میں اسرائیلی بربریت کے نتیجے میں ڈیڑھ لاکھ سے زائد فلسطینی بے گھر ہو چکے ہیں۔

یہ بھی پڑھیں: پاکستان نے فلسطین کو یو این جنرل اسمبلی کی رکنیت دینےکی قرارداد کی بھرپور حمایت کی، دفتر خارجہ

انہوں نے مزید کہا کہ خان یونس کے محاصرے سے علاقے میں خوراک اور دیگر ضروریات زندگی کی فراہمی معطل ہو گئی ہے، اور اسرائیلی فورسز فلسطینیوں کی نسل کشی جیسے سنگین جرم کا ارتکاب کر رہی ہیں۔

شہباز شریف نے بتایا کہ پاکستان کے میڈیکل کالجز میں فلسطینی طلبہ کے لیے خصوصی انتظامات کیے گئے ہیں تاکہ وہ اپنی تعلیم جاری رکھ سکیں۔

وزیرِ اعظم نے کہا کہ پاکستان نے عالمی فورمز پر فلسطینیوں کے حق خود ارادیت اور ان پر ہونے والے مظالم کے خلاف بھرپور آواز اٹھائی ہے، اور عالمی عدالت انصاف کے فلسطین سے متعلق فیصلوں اور اقوام متحدہ کی قراردادوں پر عمل درآمد کرانے کی اپیل کی ہے۔

مزید پڑھیں: کیا دنیا کے رہنما غزہ میں نسل کشی روک سکتے ہیں؟ اقوام متحدہ کے عہدیدار کی زبانی

انہوں نے مزید بتایا کہ اب تک پاکستان سے 1200 ٹن امدادی سامان اور 3 بحری جہازوں کے ذریعے 1500 ٹن امدادی سامان فلسطین بھیجا جا چکا ہے، اور پاکستانی حکومت اور عوام اپنے فلسطینی بھائیوں اور بہنوں کے ساتھ کھڑے ہیں۔