کیا امریکہ کا پاکستان کے ساتھ تعاون جاری ہے؟امریکی سفیر کی زبانی

?️ 24 جولائی 2024

سچ خبریں: پاکستان میں تعینات امریکی سفیر ڈونلڈ بلوم نے کہا ہے کہ ہم پاکستان کے آئی ایم ایف کے ساتھ کام کی حمایت کرتے ہیں اور پاکستان کے ساتھ تعاون کا سلسلہ جاری رکھیں گے۔

پاک امریکہ تعلقات کے حوالے سے منعقدہ سیمینار سے خطاب میں امریکی سفیر نے کہا کہ پاکستان اور امریکہ شراکت داری اور تعاون کی طویل تاریخ رکھتے ہیں، امریکہ پاکستان کے ساتھ تعلقات کو اہمیت دیتا ہے، امریکا سمجھتا ہے کہ پاکستان میں بہت استعداد ہے جب کہ پاکستان کے پاس متحرک نوجوان آبادی ہے۔

یہ بھی پڑھیں: امریکہ اور پاکستان عملی طور پر ایک دوسرے کے ساتھ تعاون کریں گے

ڈونلڈ بلوم نے کہا کہ پاکستان کے ساتھ تعاون کا سلسلہ جاری رکھیں گے، امریکہ اور پاکستان کے درمیان پارٹنرشپ کی بڑی تاریخ ہے، دہشتگردی کے خلاف جنگ میں پاکستان کی قربانیوں کی قدرکرتے ہیں، گزشتہ سال دونوں ممالک کے درمیان تجارت 9 ارب ڈالر سے تجاوز کرگئی، امریکہ کے نجی شعبے پاکستان کے پوٹینشل کےمعترف ہیں۔

امریکی سفیر کا کہنا تھا کہ ہم پاکستان کے آئی ایم ایف کے ساتھ کام کو سپورٹ کرتے ہیں، ہم منگلا ڈیم کو نئے ٹربائنزکےساتھ اپ گریڈ کر رہے ہیں، ہم 250 ملین ڈالر کی سرمایہ کاری صاف پانی کی فراہمی میں کر رہے ہیں جب کہ 85 ملین ڈالر میل نیوٹریشن کے خاتمے پر سرمایہ کاری کررہے ہیں۔

ڈونلڈ بلوم نے مزید کہا کہ شعبہ تعلیم اور اکیڈمک پروگرام میں 20 ملین ڈالر کی سرمایہ کاری کررہے ہیں، ہم گندھارا تہذیب کے تحفظ کی بھی حمایت کررہے ہیں جب کہ امریکا ایک بلین ڈالر صوبوں کو جسٹس اینڈ سکیورٹی پروگرام میں فراہم کررہا ہے، ہم پاکستان میں ہیلتھ کیئر سسٹم میں سرمایہ کاری کررہے اور مستقبل میں بھی سرمایہ کاری کریں گے۔

مزید پڑھیں: ہم امریکہ کے ساتھ مثبت اور تعمیری تعلقات چاہتے ہیں: پاکستان

امریکی سفیر کا کہنا تھا کہ پاکستان اور امریکا مشترکہ طور پر افغان مہاجرین اور پناہ کی تلاش میں لوگوں کو سپورٹ کررہے ہیں، خیال کیا جاتا ہےکہ پاک امریکا تعلقات کا محور سکیورٹی مسائل ہیں مگر ایسا ہرگز نہیں،گزشتہ کئی سالوں میں امریکہ نے قدرتی آفات اور معاشی میدان میں پاکستان کی حمایت کی ہے۔