پیپلز پارٹی، مسلم لیگ (ن) کے پارلیمانی وفد کی چینی حکام سے ملاقات، دو طرفہ تعلقات پر تبادلہ خیال

?️ 21 اپریل 2024

اسلام آباد: (سچ خبریں) پاکستان پیپلز پارٹی اور مسلم لیگ ن کے مشترکہ پارلیمانی وفد کی چین میں انٹرنیشنل ڈیپارٹمنٹ آف کمیونسٹ پارٹی آف چین (سی پی سی) کی وائس منسٹر سن ہائی ین سمیت زراعت اور ماہرین معاشیات سے ملاقات ہوئی جہاں پاکستان میں روزگار کے مواقع سمیت دو طرفہ تعلقات پر تبادلہ خیال کیا گیا۔

ڈان نیوز کے مطابق وائس منسٹر سن ہائی ین نے پاکستانی سیاست میں خواتین کے بڑھتے ہوئے مؤثر کردار کی تعریف کی، وائس منسٹر نے پاکستانی وفد سے گفتگو میں انتخابات کے بعد تشکیل پانے والی نئی حکومت کو مبارکباد بھی دی۔

ان کا کہنا تھا کہ پاکستان کی سیاست میں خواتین کی بڑھتی نمائندگی ایک مثبت پیغام ہے، پاکستان کا مستقبل بہت روشن ہے، دو طرفہ تعاون کو مزید مؤثر اور مضبوط بنانا انتہائی ضروری ہے۔

وائس منسٹر سن ہائی ین نے وفد سے گفتگو میں بتایا کہ کچھ عناصر سی پیک اور ہمیں روکنا چاہتے ہیں کیوں کہ وہ جانتے ہیں کہ سی پیک اہم منصوبہ ہے، چیلنجز ہیں لیکن پاکستان اور چائنہ کو مل کر ان مسائل کو حل کرنا ہے۔

اس موقع پر وفد کے سربراہ سابق وفاقی وزیر سید مرتضی محمود اور رانا ارادت شریف کا کہنا تھا کہ ملک دشمن عناصر دہشتگردی کی افسوسناک کارروائیاں کر کے پاکستان اور چین کے درمیان دراڑیں پیدا نہیں کر سکتے، یہ عناصر پاکستان کی ترقی کے دشمن ہیں، پاکستان چینی باشندوں کو مکمل سیکیورٹی فراہم کر رہا ہے، دونوں ملک مل کر دہشتگردی کا مقابلا کریں گے۔

ملاقات میں پاکستانی وفد نے حکام سے چینی باشندوں کی ہلاکت کے پر اظہار افسوس کیا اور پاکستان کی جانب سے چینی باشندوں کی سیکیورٹی کے حوالے سے لیے گئے اقدامات سے بھی آگاہ کیا۔