پاکستان کی سب سے بڑی لڑائی انتہا پسندسوچ سے ہے: فواد چوہدری

?️ 27 دسمبر 2021

اسلام آباد(سچ خبریں) وفاقی وزیر برائے اطلاعات و نشریات فواد چوہدری کا کہنا ہے کہ موجودہ حکومت کے لئے اصل چیلنج قائد اعظم کا پاکستان واپس لینا ہے لوگوں کی سوچ غلط ہے کہ اسلامی ملک کا مطلب مذہبی ملک ہے،پاکستانی ریاست کی سب سے بڑی لڑائی انتہا پسند سوچ سے ہے، پاکستان کو اس سوچ کی لڑائی لڑنی ہے۔

تفصیلات کے مطابق وفاقی وزیر برائے اطلاعات و نشریات فواد چوہدری کا کہنا ہے کہ قائد اعظم کا پاکستان واپس لینا ہمارے لیے اصل چیلنج ہے، آج عمران خان اس پاکستان کو بنانا چاہتے ہیں جو قائد اعظم  نے سوچا تھا۔فواد چوہدری کا کہنا تھا کہ قائد اعظم ہرگز پاکستان کو مذہبی ملک کی طرح نہیں دیکھتے تھے، لوگ بے وقوف بنا رہے ہیں کہ اسلامی ملک کا مطلب مذہبی ملک تھا، پاکستانی ریاست کی سب سے بڑی لڑائی انتہا پسند سوچ سے ہے، پاکستان کو اس سوچ کی لڑائی لڑنی ہے۔

وفاقی وزیر نے مزید  کہا کہ افغانستان میں مخصوص سوچ پاکستان کے لیے خطرہ ہے۔ فواد چوہدری کا کہنا تھا کہ مذہبی اقدار میں دخل اندازی سے ریاست و حکومت کا کوئی تعلق نہیں ہوتا، 11 اگست 1947 کو قائد اعظم  نے واضح کیا اقلیتوں کے کیا حقوق ہوں گے۔