وزیر اعظم نے سید علی گیلانی کا جسد خاکی چھیننا انتہائی شرمناک قرار دیا

?️ 5 ستمبر 2021

اسلام آباد (سچ خبریں) وزیر اعظم عمران خان نے بھارتی فورسز کی جانب سے  92سالہ حریت رہنما  سید  علی گیلانی کا جسد خاکی چھیننا انتہائی شرمناک قرار دے دیا۔ان کا کہنا تھا کہ ایسا کرنا بھارت میں فاشزم کی ایک اور مثال ہے سید علی گیلانی طویل علالت کے بعد انتقال کر گئے۔

وزیر اعظم عمران خان نے حریت رہنما سید علی گیلانی کے جسد خاکی کی بے حرمتی کرنے کی مذمت کرتے ہوئے کہا کہ بزرگ کشمیری رہنما علی گیلانی کے اہل خانہ کے خلاف مقدمہ درج کرنا اور بھی شرمناک ہے۔وزیر اعظم نے اپنے ٹوئٹر اکاؤنٹ سے جاری بیان میں کہا کہ ایسا کرنا بھارت میں فاشزم کی ایک اور مثال ہے، جس سے پتہ چلتا ہے کہ بھارت نازی اور آر ایس ایس کے نظرئیے سے حکومت موجود ہے۔

خیال رہے کہ سید علی گیلانی گزشتہ روز طویل علالت کے بعد انتقال کر گئے تھے۔ جموں و کشمیر پر قابص بھارتی فورسز کی جانب سے ان کی تدفین کے لیے دباؤ ڈالا جا رہا تھا اور وادی میں کرفیو نافذ کر کے انٹرنیٹ سروس بھی معطل کر دی گئی تھی۔

سید علی گیلانی کا جسد خاکی کو چھیننے کے بعد حیدر پورہ کے قبرستان میں صبح ساڑھے 4 بجے سپرد خاک کیا گیا تھا، اور اس سلسلے میں بھارتی فورسز نے حیدر پورہ قبرستان کو بھی سیل کر دیا ہے۔بھارت فورسز نے ان کا جسدخاکی چھیننے کے بعد سید علی گیلانی کے اہل خانہ پر جسد خاکی کو پاکستانی پرچم میں لپیٹنے اور پاکستان کے حق میں نعرے لگانے کا مقدمہ بھی درج کیا تھا۔