نمازی مسجد میں ماسک کا استعمال کریں: مولانا طاہر اشرفی

?️ 7 اپریل 2021

اسلام آباد( سچ خبریں)وزیراعظم کے نمائندہ خصوصی مولانا طاہر اشرفی کا کہنا ہے کہ رمضان میں مساجد میں طے شدہ ایس او پیز کے مطابق عمل درآمد کیا جائے گا،نمازی مساجد میں ماسک کا استعمال کریں،فحاشی سے متعلق عمران خان کے بیان کو لوگوں نے غلط رنگ دیا، بچیوں کے ساتھ زیادتی کرنے والوں کو کڑی سے کڑی سزا دینی چاہیے۔

اسلام آباد میں وزیراعظم کے معاون خصوصی برائے مذہبی ہم آہنگی طاہراشرفی نے پریس کانفرنس میں بتایا کہ صدر مملکت کیساتھ 2 روز قبل کورونا سے متعلق اجلاس ہوا مختلف مسالک کے اسکالرز شریک ہوئے، اجلاس میں طے ہوا کہ ایس او پیز کے تحت اس سال بھی مساجد کھلی رہیں گی۔

انہوں نے کہا کہ افواہیں ہیں کہ مساجد اور امام بارگاہیں بند ہوں گی،لوگوں سے اپیل ہے کہ گھر سے وضو کرکے مساجد آئیں، کورونا کی تیسری لہر شدید ہے، اس سے زیادہ سے زیادہ بچا جائے۔ مولانا طاہر اشرفی نے ملک بھر میں مہنگائی پر گفتگو کرتے ہوئے کہا کہ  حکومت منہگائی کو قابو پانے کے لیے اقدامات کررہی ہے۔

ان کا کہنا تھا کہ  تاجر تنظیمیں رمضان میں اپنا منافع پچاس فی صد کم کر دیں۔طاہر اشرفی نے کہا کہ عمران خان کی حکومت کے حوالے سے بات کرتے ہوئے کہا کہ عمران خان کی حکومت  میں مسجد اور مدرسے پہلے سے زیادہ مضبوط ہوئے ہیں، علماکے ساتھ مل کر وقفی املاک ایکٹ کے معاملات کی بھی اصلاح کی جائے گی۔