میں کسی وزیر یا وزیر اعظم کو جواب دہ نہیں ہوں۔ مراد علی شاہ
کراچی(سچ خبریں) کراچی وزیر اعلیٰ سندھ سید مراد علی شاہ وفاقی حکوت پر نتقید کرتے ہوئے کہا کہ میں کسی وزیر یا وزیر اعظم کو جواب دہ نہیں ہوں ان کی ذمہ داری ہے وہ صوبائی اسمبلی کو جواب دیں۔
ڈاؤ یونیورسٹی آف ہیلتھ سائنسز کے اوجھا کیمپس میں بائیو فارماسیوٹیکل مینوفیکچرنگ فیسیلٹی کے افتتاح کے بعد میڈیا سے بات کرتے ہوئے مراد علی شاہ نے کہا کہ آئین پاکستان کے مطابق وہ نہ وزیر اعظم کو جواب دہ ہیں، نہ ہی وفاق کے کسی اور عہدیدار کو وہ صرف سندھ کے عوام کی نمائندہ سندھ اسمبلی کو جواب دہ ہیں۔
انہوں نے کہا کہ وفاقی وزیر علی زیدی کے حوالے سے خط کا معاملہ ایک خالص دفتری یا کانفیڈنشل معاملہ ہے اس لیے وہ اس پر عوام یا میڈیا کے سامنے کوئی بات نہیں کریں گے۔
قبل ازیں تقریب سے خطاب کرتے ہوئے وزیر اعلیٰ سندھ نے کہا کہ کروڑوں روپے مالیت کی ادویات بیرون ملک سے خریدنے سے بہتر ہے کہ ہم اپنی ادویات خود بنائیں۔
انہوں نے ڈاؤ یونیورسٹی کے وائس چانسلر پروفیسر سعید قریشی کو مبارکباد دیتے ہوئے کہا کہ آپ آور آپ کی ٹیم قابل تحسین ہیں جو کافی تعداد میں جان بچانے والی ادویات ڈاؤ یونیورسٹی میں تیار کرنے میں کامیاب ہو گئے ہیں۔
وائس چانسلر ڈاؤ یونیورسٹی نے وزیر اعلیٰ سندھ کو بریفنگ دیتے ہوئے بتایا کہ ڈاؤ یونیورسٹی سانپ اور کتے کے کاٹے کی ویکسین بنانے کا لائسنس حاصل کرچکی ہے۔
انہوں نے بتایا کہ ڈاؤ یونیورسٹی کی بائیو فارماسیوٹیکل مینوفیکچرنگ فیسیلٹی میں مختلف اقسام کی جان بچانے والی ویکسین تیار کی جاسکتی ہیں، جبکہ ڈاؤ یونیورسٹی کو خون کے اجزا سے دوائیں بنانے کا لائسنس بھی مل چکا ہے۔
واضح رہے کہ دو روز قبل کراچی کمیٹی کے اجلاس میں تکرار کے بعد وفاقی وزیر علی حیدر زیدی اور وزیر اعلیٰ سندھ آمنے سامنے آگئے ہیں اور دونوں اعلیٰ شخصیات نے وزیر اعظم کو خط لکھ کر اپنے تحفظات کا اظہار کیا تھا۔
کراچی میں ترقیاتی کاموں کے لیے قائم کمیٹی کے 16 جنوری کو ہونے والے اجلاس میں وفاقی وزیر علی حیدر زیدی اور وزیر اعلیٰ کے درمیان تلخ کلامی کی رپورٹس سامنے آئی تھیں۔
علی حیدر زیدی نے ٹوئٹر پر اپنی ٹوئٹس کے سلسلے میں اس بات کی تصدیق کرنے کے ساتھ ساتھ مراد علی شاہ اور ان کی جانب سے وزیر اعظم کو لکھے گئے خطوط اور اس حوالے سے اپنے تحفظات کا اظہار کیا۔
دوسری جانب کراچی میں پریس کانفرنس کرتے ہوئے وزیر تعلیم سندھ سعید غنی کا کہنا تھا کہ ‘افسوس کی بات ہے کہ وزیر اعظم کو لکھا گیا خط ایک وزیر کے ہاتھ لگا اور وہ میڈیا کو جاری کردیا گیا’۔انہوں نے کہا کہ وفاق اور صوبے میں تعاون کو وفاقی وزیر علی زیدی کی وجہ سے نقصان پہنچا ہے
