شہریوں کی شکایات، وزیراعظم کا اہم فیصلہ

?️ 12 فروری 2022

اسلام آباد (سچ خبریں) وزیراعظم عمران خان نے شہریوں کی شکایات کے حوالے سے اہم فیصلہ لیتے ہوئے  15 لاکھ میں سے 2 لاکھ 38ہزار شکایات دوبارہ کھولنے کا حکم دے دیا۔ صوبائی سطح پر نظر ثانی کی نگرانی متعلقہ چیف سیکریٹری و آئی جی کریں، وفاقی سطح پرمتعلقہ وزارت کےسیکرٹری کی شکایات نظر ثانی کی ذمہ داری ہوگی۔

تفصیلات کے مطابق وزیر اعظم عمران خان نے شہریوں کی شکایات پر بڑا فیصلہ کرتے ہوئے گزشتہ سال کی حل 15 لاکھ میں سے 2 لاکھ 38ہزار شکایات دوبارہ کھولنے کا حکم دے دیا۔وزیراعظم نے ہدایت کی کہ شکایات کو نظر ثانی کیلے مجاز اعلی افسران کے حوالے کیا جائے۔

اس حوالے سے وزیراعظم آفس کا کہنا ہے کہ صوبائی سطح پر نظر ثانی کی نگرانی متعلقہ چیف سیکریٹری و آئی جی کریں، وفاقی سطح پرمتعلقہ وزارت کےسیکرٹری کی شکایات نظر ثانی کی ذمہ داری ہوگی۔وزیراعظم نے وفاقی اداروں کی کل ایک لاکھ 7ہزار شکایات کو دوبارہ کھولنے کا بھی حکم دیا ، وزیراعظم آفس نے بتایا کہ صوبائی سطح پر80ہزارشکایات حکومت پنجاب کے ماتحت اداروں کی ہیں۔

وزیراعظم آفس کے مطابق حکومت کےپی کےماتحت اداروں کی 27 ہزار شکایات کو کھولا جائے گا جبکہ سندھ کی 15ہزار، بلوچستان کی 3 ہزار، آزاد کشمیر کی  1100شکایات اور گلگت بلتستان کی 400 شکایات پر نظر ثانی ہوگی۔وزیراعظم آفس نے کہا شکایات میونسپل سروسز،بجلی و گیس،مواصلات اور شعبہ تعلیم سے متعلق ہیں اور ہدایت دی کہ شکایات پر نظر ثانی کر کے متعلقہ اعلی افسران رپورٹ جمع کرائیں۔