شمالی وزیر ستان میں فوج کے 3 جوان شہید ہو گئے

?️ 6 جولائی 2021

وزیر ستان (سچ خبریں) قبائلی ضلع شمالی وزیرستان میں ایک چوکی پر مشتبہ دہشت گردوں کے حملے میں پاک فوج کے 3 جوان شہید اور ایک زخمی ہوگیا  ضلع میں سیکیورٹی سے متعلق امور سے نمٹنے والے عہدیداروں نے میڈیا کو بتایا کہ دہشت گردوں نے افغان سرحد سے متصل حسن خیل کے علاقے میں بیزا چیک پوسٹ پر حملہ کیا۔

ان کا کہنا تھا کہ صبح سویرے ہونے والے حملے میں 3 فوجی شہید اور ایک زخمی ہوا۔انہوں نے بتایا کہ زخمی فوجی کو دوٹوئی کے علاقے میں ہسپتال منتقل کیا گیا۔

حکام نے بتایا کہ دہشت گردوں نے حملے میں بھاری ہتھیاروں کا استعمال کیا۔شمالی وزیرستان اور اس سے ملحقہ قبائلی ضلع میں سیکیورٹی فورسز پر حملوں میں اضافہ ہوا ہے، جب سے طالبان نے افغانستان میں افغان اہلکاروں کے خلاف کارروائی تیز کی ہے۔

گزشتہ ہفتے افغانستان کے اندر سے دہشت گردوں نے شمالی وزیرستان کے علاقے دوٹوئی میں ایک فوجی چوکی پر فائرنگ کی تھی جس میں 2 فوجی شہید جبکہ 2 زخمی ہوگئے تھے۔

اسی دن جنوبی وزیرستان میں 3 فوجی شہید ہوگئے تھے۔غیر ملکی خبر رساں ادارے ’رائٹرز‘ کے مطابق پاک فوج واقعے کے بارے میں رپورٹس کا جائزہ لے رہی ہے۔