سیالکوٹ سانحے پر وفاقی وزیرکا تشویش کا اظہار

?️ 5 دسمبر 2021

اسلام آباد(سچ خبریں) سیالکوٹ کے المناک سانحے پر  وفاقی وزیر مذہبی امور پیر نورالحق قادری نے تشویش کا اظہار کرتے ہوئے کہا ہے کہ نوجوان نسل سے متعلق بہت تشویش ہے واقعہ کی تحقیقات ہو رہی ہے تحقیقات کے بعد ہی معلوم ہو گا کہ اس کے پس پردہ کیا عوامل تھے۔

جیو نیوز کے پروگرام نیا پاکستان میں گفتگو کرتے ہوئے نورالحق قادری کا کہنا تھا کہ صورتحال تشویشناک ہے، لوگوں کے رویوں میں تشدد آرہا ہے۔پروگرام کے دوران وفاقی وزیر کا کہنا تھا کہ سیالکوٹ میں کسی تحقیق یا ثبوت کے بغیر اس طرح کی اشتعال انگیزی کی گئی، نوجوان نسل سے متعلق بہت تشویش ہے۔

انہوں نے کہا کہ واقعے کی تحقیقات ہوں گی، جاننے کی کوشش کریں گے کہ اس کے پس پردہ کیا عوامل تھے کیونکہ یہ مجمع وہیں جمع ہوا۔واضح رہے کہ دو روز قبل سیالکوٹ کی اسپورٹس گارمنٹ کی فیکٹری کے سری لنکن منیجر پریانتھا کمارا پر فیکٹری ورکرز نے مذہبی پوسٹر اتارنے کا الزام لگا کر حملہ کیا اور پھر بہیمانہ تشدد کے بعد جان سے مار کر لاش جلا دی تھی۔

خیال رہے کہ دنیا بھر کے میڈیا نے پاکستان میں ہونے والے اس افسوسناک واقعے کو پوری منظر کشی کے ساتھ بیان اور نشر کیا جبکہ بعض نشریاتی اداروں نے اس واقعے کے حوالے سے پاکستان میں پیش آنے والے توہین رسالت کے مبینہ واقعات کو بھی پوری تفصیل کے ساتھ اپنے اپنے انداز سے پیش کیا۔