حکومت نےایک مرتبہ پھر اپوزیشن کو مذاکرات کی پیشکش کر دی

?️ 18 نومبر 2021

اسلام آباد (سچ خبریں) انتخابی اصلاحات کے معاملے پر حکومت نے ایک مرتبہ پھر سے اپوزیشن کو مذاکرات کی پیشکش کر دی ہے وفاقی وزیر فواد چوہدری نے کہا ہے کہ اپوزیشن اراکین کے ای وی ایم کے نظام پر تمام خدشات دور کریں گے اگلے دو سال پاکستان کی تاریخ کے اگلے دو عشروں کی سیاست طے کریں گے۔

تفصیلات کے مطابق وفاقی وزیر فواد چوہدری نے اپوزیشن کو مذاکرات کی پیشکش کرتے ہوئے کہا کہ اپوزیشن کو ایک مرتبہ پھر کہتا ہوں کہ عدالت کے بجائے اسپیکر آفس آئے، اصلاحات کے لیے ہم اپوزیشن کی تجاویز کا خیرمقدم کریں گے۔

انہوں نے کہا کہ اپوزیشن اراکین کے ای وی ایم کے نظام پر تمام خدشات دور کریں گے۔ مائیکروبلاگنگ ویب سائٹ ٹویٹر پر اپنے پیغام میں وفاق وزیر فواد چوہدری کا کہنا ہے کہ اوورسیز پاکستانیوں کے ووٹ کے حق پر پیچھے نہیں ہٹ سکتے یہ ہمارا انتخابی وعدہ تھا۔

ٹویٹر پیغام میں فواد چوہدری نے کہا کہ اگلے دو سال پاکستان کی تاریخ کے اگلے دو عشروں کی سیاست طے کریں گے۔نوازشریف اور آصف زرداری کی فیملی سیاست قصہ پارینہ ہے۔ اب اپوزیشن میں بھی نئے کھلاڑیوں کی باری ہے۔ اگلے دو سال پاکستان کی تاریخ کے اگلے دو عشروں کی سیاست طے کریں گے۔ 1990ء کی دہائی کی سیاست کا مکمل اختتام اگلے دو سال کےلیے طے ہے۔

یاد رہے کہ گذشتہ روز پارلیمنٹ کا مشترکہ اجلاس طلب کیا گیا تھا ، جس میں پارلمنٹ نے انتخابی اصلاحات دوسرا ترمیمی بل 2021ء منظور کر لیا۔خیال رہے کہ اپوزیشن نے انتخابی اصلاحات بل کی منظوری کیخلاف عدالت جانے کا اعلان کر رکھا ہے جبکہ اپوزیشن لیڈر قومی اسمبلی شہباز شریف نے بھی گذشتہ روز پارلیمنٹ کے مشترکہ اجلاس سے خطاب کرتے ہوئے ای وی ایم مشین کو شیطانی مشین قرار دیا تھا۔

انہوں نے کہا ہے کہ سلیکٹڈ حکومت عوام کے پاس ووٹ کیلئے نہیں جا سکتی۔ جبکہ پاکستان پیپلز پارٹی کے چئیرمین بلاول بھٹو نے بھی آئندہ انتخابات کے نتائج نہ ماننے کا اعلان کرتے ہوئے کہا تھا کہ اسپیکر اور حکومت آئندہ انتخابات متنازعہ بنا رہے ہیں، الیکٹرانک ووٹنگ مشین کسی صورت نہیں مانیں گے۔