حکومت اور اپوزیشن میں اعلیٰ سطح پر رابطے بحال ہوگئے

?️ 12 نومبر 2021

اسلام آباد (سچ خبریں) حکومت اور اپوزیشن میں اعلیٰ سطح پر رابطے بحال ہو گئے ہیں جس کے بعد رہنماؤں میں اہم ملاقات آج اسپیکر آفس میں رکھی گئی ہے اور ملاقات میں اہم امور پر تبادلہ خیال متوقع ہے، اپوزیشن کی درخواست پر الیکشن کمیشن ممبران کی تعیناتی کی کمیٹی تبدیل کردی گئی ہے۔

تفصیلات کے مطابق حکومت اور اپوزیشن میں اعلیٰ سطح پر رابطے بحال ہوگئے ، ذرائع کا کہنا ہے کہ دونوں اطراف کے اہم رہنما آج باضابطہ ملاقات کریں گے، ملاقات اسپیکر آفس میں ہوگی۔اپوزیشن کی درخواست پر الیکشن کمیشن ممبران کی تعیناتی کی کمیٹی تبدیل کردی گئی ہے۔

گزشتہ روزپارلیمانی کمیٹی کی تشکیل نو کرتے ہوئے چار نئےارکان کو شامل کیا گیا تھا، جس میں حکومت سے اعظم سواتی اور سینیٹر منظور کاکڑ جبکہ اپوزیشن سےاعظم نذیر تارڑ اور تاج حیدر شامل کیے گئے تھے۔سینیٹ سیکرٹریٹ نے کمیٹی میں نئے ارکان کی شمولیت کا نوٹیفکیشن جاری کر دیا۔

یاد رہے حکومت نے اہم امور پر قانون سازی کے لئے ایک بار پھر اپوزیشن سے باضابطہ رابطہ کیا تھا ، اس سلسلے میں اسپیکر قومی اسمبلی اسد قیصر نے اپوزیشن لیڈر شہباز شریف کو خط لکھا۔جس میں کہا تھا کہ اپوزیشن اور حکومت کو وسیع تر قومی مفاد کو مدنظر رکھنا ہوگا، مشترکہ مفادات کی اہم اصلاحات پر اتفاق کیلئے آگے بڑھنا چاہئے۔

اسپیکر قومی اسمبلی نے شہباز شریف کو باورکرایا کہ اہم قانون سازی سے متعلق مختلف بلز قومی اسمبلی سےپاس ہوچکےمگر سینیٹ سے منظور نہ ہوسکے، مذکورہ بل پارلیمنٹ کے مشترکہ اجلاس میں زیرغور آنےہیں، بلز پر غور ، ترامیم تجویز کیلئے متفقہ کمیٹی تشکیل دی گئی تھی، کمیٹی کی طرف سے مشاورتی عمل مکمل نہیں ہو سکا، امید ہے اپوزیشن لیڈر اس عمل کو بامقصدبنانے کیلئےکردار ادا کرے گی۔