ٹرمپ کی توہین پر ویٹیکن کا ردعمل

?️ 13 اپریل 2026

سچ خبریں:ویٹیکن کے سینئر عہدیدار نے ٹرمپ کے توہین آمیز بیان پر ردعمل دیتے ہوئے اسے اخلاقی زوال قرار دیا اور عالمی سطح پر تشویش کا اظہار کیا

ویٹیکن کے ایک اعلیٰ عہدیدار نے امریکی صدر ڈونلڈ ٹرمپ کی جانب سے کیتھولک دنیا کے روحانی پیشوا کے خلاف توہین آمیز بیان پر سخت ردعمل دیتے ہوئے اسے ایک جاری اخلاقی زوال قرار دیا ہے۔

خبر رساں ادارے کے مطابق، ویٹیکن کے دفترِ مواصلات کے مشیر جیمز مارٹن نے سوشل میڈیا پلیٹ فارم ایکس پر ٹرمپ کے توہین آمیز پیغام کو شیئر کرتے ہوئے کہا کہ انہیں شک ہے کہ پوپ لیو چہاردہم اس معاملے پر اپنی افریقی دورے سے قبل کوئی خاص پریشانی محسوس کریں گے یا اس سے متاثر ہوں گے۔

انہوں نے کہا کہ اس کے باوجود یہ معاملہ ہمارے لیے اہم ہونا چاہیے کیونکہ یہ رویہ پاگل پن، بے رحمی اور غیر مسیحی طرزِ عمل کی عکاسی کرتا ہے۔

انہوں نے سوال اٹھایا کہ کیا اس اخلاقی زوال کا کوئی خاتمہ نہیں ہے؟

اس سے قبل پوپ لیو چہاردہم نے خبر رساں ادارے سے گفتگو کرتے ہوئے ٹرمپ کے بیانات پر ردعمل میں کہا تھا کہ وہ ان زبانی حملوں کے باوجود جنگ کی مذمت جاری رکھیں گے۔

انہوں نے مزید کہا کہ وہ کوئی سیاسی کردار ادا نہیں کرنا چاہتے اور نہ ہی ٹرمپ کے ساتھ کسی بحث یا تنازع میں پڑنے کے خواہاں ہیں۔

یاد رہے کہ گزشتہ روز ٹرمپ نے ایک بیان میں کہا تھا کہ وہ پوپ کو پسند نہیں کرتے اور اپنے بھائی کو ان پر ترجیح دیتے ہیں۔

ٹرمپ نے پوپ لیو چہاردہم کی امریکی پالیسیوں پر تنقید کو بھی ناپسند کرتے ہوئے کہا کہ وہ نہیں چاہتے کہ پوپ امریکی صدر پر تنقید کریں۔

دوسری جانب پوپ لیو چہاردہم نے اتوار کے روز لبنان کے عوام کے ساتھ یکجہتی کا اظہار کرتے ہوئے کہا کہ ان کی حفاظت ایک اخلاقی ذمہ داری ہے، جبکہ انہوں نے ایران کے خلاف ٹرمپ کے بیانات کو بھی ناقابل قبول قرار دیا تھا۔