امریکہ میں انڈوں کی قیمت میں اضافہ؛ پنسیلوانیا میں 40 ہزار ڈالر کا انڈوں کا ذخیرہ چوری

?️ 5 فروری 2025

سچ خبریں:امریکہ میں مہنگائی کی بڑھتی لہر کے دوران انڈوں کی قیمتوں میں نمایاں اضافہ دیکھا گیا ہے اور اسی بحران کے درمیان پنسیلوانیا میں ایک ٹرک سے 40 ہزار ڈالر مالیت کے انڈے چوری کر لیے گئے۔

سی بی ایس نیوز کی رپورٹ کے مطابق، امریکہ میں انڈوں کی قیمتوں میں اضافے کے پس منظر میں ایک کمپنی کے ترسیلی ٹرک سے تقریباً 100,000 انڈے چوری ہو گئے۔

یہ بھی پڑھیں: امریکہ میں مہنگائی اور مکانات کی آسمان چھوتی قیمتیں

واضح رہے کہ یہ چوری پنسیلوانیا میں ایک معروف انڈا پروڈکشن کمپنی کے ٹرک پر حملے کے دوران ہوئی، پولیس نے اس معاملے کی تحقیقات شروع کر دی ہیں، جبکہ کمپنی نے بھی قانون نافذ کرنے والے اداروں کے ساتھ تعاون کی تصدیق کی ہے۔

چوری کا شکار ہونے والی مرغداری Pete & Gerry’s Organics ہے جو معروف کمپنی Nellie’s Free Range کا حصہ ہے۔

سی بی ایس نیوز کے تجزیے کے مطابق، 2019 سے 2024 تک امریکہ میں انڈوں کی قیمتوں میں 160 فیصد اضافہ ہوا۔

اس مہنگائی کی سب سے بڑی وجہ پرندوں میں پھیلنے والا برڈ فلو ہے، جس نے صرف دسمبر میں لاکھوں مرغیوں کی ہلاکت کا سبب بنا۔

امریکی محکمہ زراعت (USDA) کی رپورٹ کے مطابق، حالیہ مہینوں میں ملک بھر میں انڈوں کی قلت کی اطلاع دی گئی ہے۔

برڈ فلو کی وبا کے نتیجے میں ملک بھر میں لاکھوں مرغیاں مر چکی ہیں، جس کی وجہ سے انڈوں کی پیداوار میں شدید کمی آئی ہے، اس بحران نے انڈوں کی قیمتوں کو مزید بلند ترین سطح پر پہنچا دیا ہے۔

قابل ذکر ہے کہ امریکہ میں خوراک کی مہنگائی کی وجہ سے چوری جیسے واقعات میں اضافہ ہو رہا ہے، خاص طور پر ان اجناس کی جو مہنگی ہو چکی ہیں۔

مزید پڑھیں: امریکہ میں مہنگائی اپنے عروج پر ہے: وائٹ ہاؤس

یہ واقعہ اس بات کا عکاس ہے کہ معاشی بحران اور اشیائے خوردونوش کی قیمتوں میں اضافے کے اثرات امریکہ میں بڑھتے جا رہے ہیں۔