پوپ فرانسس کے بعد ایک اور اهم شخصیت نے کیا نجف اشرف کا تاریخی دوره

?️ 25 مارچ 2021

نجف (سچ خبریں) پاکستان آرمی کے چیئرمین جوائنٹ چیفس آف اسٹاف کمیٹی جنرل ندیم رضا نے عراق کے شیعہ رہنما آیت اللہ حافظ بشیر حسین نجفی سے ان کی مرکزی دفتر نجف اشرف میں ملاقات کی۔

تفصیلات کے مطابق آیت اللہ حافظ بشیر حسین نجفی  نے مرکزی دفترنجف اشرف میں اسلامی جمہوریہ پاکستان کی فوج کے چیئرمین جوائنٹ چیفس آف اسٹاف کمیٹی جنرل ندیم رضا کا خیرمقدم کرتے ہوئے ان سے اپنی نصیحتوں میں فرمایا کہ حکومت پاکستان کا عراق کے ساتھ اقتصادی تعاون قائم کرنا اور موجودہ تعلقات کو فروغ دینا اولین مقصد ہونا چاہئے، اس کے لئے آپ کو قدم بڑھانا چاہئے اسلئے کہ عراق پاکستان کے مقابل ایک چھوٹا ملک ہے لیکن خدا نےاسے تیل اور یورونیم جیسی نعمات سے نوازا ہے۔

انہوں نے مزید کہا کہ دنیا کی بڑی طاقتیں عراق سے اپنے تعلق بہتر کرکے اس سےفائدہ اٹھا رہی ہیں اور مزید اٹھانا چاہتی ہیں لہذا آپ بھی قدم بڑھائیں اور تعلقات کو استوارکریں

آیت اللہ حافظ بشیر حسین نجفی نے کہا کہ میں اپنی جانب سے عراق کے سربراہان حکومت کو نصیحت کرچکا ہوں اور کرتا رہوں گا کہ وہ پاکستان سے اقتصادی وصنعتی تعلقات کو بہتر بنائیں اسلئے کہ پاکستان اس میدان میں عراق کی بہتر انداز میں مدد کرسکتا ہے اور مناسب اور سستی قیمتوں پر اس کی ضروریات کی فراہمی کو یقینی بناسکتا ہے لیکن حکومت پاکستان کو بھی چاہئے کہ وہ تمام شعبوں میں خاص کر اقتصادی و صنعتی تعلقات کو مزید بہتر بنائیں اور وہ چیزیں جو عراق میں نہیں ہیں جیسے چاول، اگر کسی دوسرے ملک سے یہ چیزیں آتی ہیں تو آپ اس سے کم قیمت پر عراق کو فراہم کر سکتے ہیں اوراس کے بدلے عراق کے پاس جو نعمات ہیں جیسے تیل وغیرہ اور جس کی پاکستان کو ضرورت بھی ہے اس سے فائدہ اٹھا سکتے ہیں۔

انہوں نے مزید کہا کہ اس کے علاوہ صنعت کے شعبے میں کم مدت اور کم قیمت پر عراق میں صنعتی کمپنیاں لگائی جاسکتی ہیں جس سے عراقیوں کو روزگار بھی ملے گا اور پاکستان اقتصادی طور پر فائدہ اٹھا سکے گا۔

آخر پر آئے ہوئے معزز مہمان نے قیمتی وقت دینے پر آیت اللہ حافظ بشیر حسین نجفی کا شکریہ ادا کیا۔