ٹرمپ اور فیفا کے صدر انفینٹینو کی قربت کی اصل وجہ کیا ہے؟

?️ 7 دسمبر 2025

ٹرمپ اور فیفا کے صدر انفینٹینو کی قربت کی اصل وجہ کیا ہے؟

امریکی  صدر ڈونلڈ ٹرمپ اور فیفا کے صدر جیانی انفینٹینو کے درمیان بڑھتی ہوئی قربت محض ایک ذاتی دوستی نہیں بلکہ سیاست، کھیل اور تجارت کے باہمی مفادات کا نتیجہ ہے۔ تجزیہ کاروں کے مطابق یہ تعلق اس بات کی علامت ہے کہ فیفا اب کھل کر سیاست میں داخل ہو چکا ہے اور فٹ بال کو عالمی اثر و رسوخ کے ایک ذریعے کے طور پر استعمال کیا جا رہا ہے۔

اطلاعات کے مطابق ٹرمپ 2026 کے فٹ بال ورلڈ کپ کو اپنی سیاسی طاقت بڑھانے کے ایک بڑے موقع کے طور پر دیکھتے ہیں۔ چونکہ امریکہ میکسیکو اور کینیڈا کے ساتھ مشترکہ طور پر اس ایونٹ کی میزبانی کرے گا، اس لیے ٹرمپ اسے اپنی حکومت کی کامیابی کے طور پر پیش کرنا چاہتے ہیں۔ وہ اس عالمی ایونٹ کو اندرونِ ملک سیاست میں بھی بطور ہتھیار استعمال کرنے کے خواہاں ہیں، خاص طور پر ان شہروں پر دباؤ ڈالنے کے لیے جو ان کے سیاسی مخالفین کے زیر انتظام ہیں۔

دوسری جانب جیانی انفانتینو کا مقصد امریکہ میں فٹ بال کو ایک بڑی اور منافع بخش صنعت کے طور پر مستحکم کرنا ہے۔ وہ فیفا کو ایک بار پھر امریکی سیاسی اور اقتصادی نظام کے ساتھ مضبوطی سے جوڑنا چاہتے ہیں، خاص طور پر 2015 کے بدعنوانی اسکینڈل کے بعد۔ ان کے نزدیک ٹرمپ اس راستے کی ایک اہم کنجی ہیں جو سرمایہ کاری، اسپانسرشپ اور بڑے کاروباری مواقع تک فیفا کی رسائی کو ممکن بنا سکتے ہیں۔

دونوں رہنماؤں کے درمیان یہ تعلق ایک باہمی مفاد پر مبنی اتحاد ہے۔ ٹرمپ کو عالمی سطح پر تشہیر، طاقت اور عوامی مقبولیت کا موقع ملتا ہے، جبکہ انفانتینو کو ایک وسیع منڈی، مالی فوائد اور فٹ بال کو مزید کمرشلائز کرنے کا موقع حاصل ہوتا ہے۔ اسی تناظر میں فیفا نے امریکہ میں اپنے دفاتر کا دائرہ کار بڑھایا ہے، جن میں نیویارک کے ٹرمپ ٹاور اور میامی میں قائم دفاتر شامل ہیں۔

ماہرین کے مطابق یہ صورتحال فیفا کے کردار میں ایک بڑی تبدیلی کی عکاسی کرتی ہے، جہاں پہلے یہ ادارہ خود کو غیر سیاسی ظاہر کرتا تھا، مگر اب وہ کھل کر طاقتور سیاسی شخصیات سے روابط کو فروغ دے رہا ہے۔ فیفا کی جانب سے ٹرمپ کو امن کے لیے خدمات” کے نام پر خصوصی ایوارڈ دینا اسی سیاسی رجحان کی ایک مثال قرار دیا جا رہا ہے۔

مبصرین کا کہنا ہے کہ آئندہ ورلڈ کپ صرف ایک کھیلوں کا مقابلہ نہیں ہوگا بلکہ یہ سیاست، کاروبار اور عالمی طاقت کے اظہار کا ایک بڑا پلیٹ فارم بن چکا ہے، جہاں فٹ بال حکومتوں اور اداروں کے لیے منافع اور اثر و رسوخ حاصل کرنے کا ذریعہ بنتا جا رہا ہے۔