فلسطینیوں کا قتل عام جاری رکھیں گے:صیہونی وزیر جنگ

?️ 25 فروری 2023

سچ خبریں:انتہا پسند صیہونی وزیر جنگ یواف گیلنٹ نے فلسطینی قوم کو دھمکی دی کہ وہ مسلح فلسطینیوں کا قتل عام جاری رکھیں گے۔

فلسطین کی خبر رساں ایجنسی سما کی رپورٹ کے مطابق صیہونی وزیر جنگ گیلنٹ نے قابض فوج کی مسلح فلسطینیوں کا مقابلہ کرنے کی پالیسی کے بارے میں بات کرتے ہوئے کہا کہ اسرائیلی فوج اور سکیورٹی فورسز ان مسلح افراد اور ان کو بھیجنے والوں کے ساتھ انتہائی پرتشدد کاروائی کریں گی۔

انہوں نے مزید کہا کہ چند ہفتے قبل جینین ، اریحا اور نابلس میں بھی ایسی ہی صورتحال تھی، گیلنٹ نے مزید کہا کہ ہم مسلح فلسطینیوں کا خاتمہ جاری رکھیں گے اور اگر ضروری ہوا تو ہم ہر شعبے میں کاروائی کریں گے۔

صیہونی وزیر جنگ کی دھمکی عرین الاسود کی طرف سے فلسطینی عوام کے نام ایک پیغام میں اعلان کرنے کے چند گھنٹے بعد سامنے آئی جس میں صیہونی حکومت کو خبردار کرتے ہوئے کہا گیا کہ ہم سب سے کہتے ہیں کہ تمام فلسطینی سڑکوں پر نکل آئیں تاکہ پوری دنیا سن سکے کہ فلسطینی جوان اور مجاہدین کسی بھی جنگ اور فوری ردعمل کے لیے پوری طرح تیار ہیں۔

قابل ذکر ہے کہ بدھ کی صبح صیہونی حکومت نے بعض فلسطینیوں کو گرفتار کرنے کے بہانے مغربی کنارے کے شہر نابلس پر دھاوا بولا اور فلسطینیوں کے ساتھ جھڑپیں کیں جس کے نتیجے میں 10 فلسطینی شہید اور 102 زخمی ہوگئے، نابلس پر صیہونی حملے میں 10 فلسطینیوں کی شہادت کے بعد مختلف فلسطینی گروپوں نے الگ الگ بیانات میں اعلان کیا کہ جارحیت کا تسلسل اور مغربی کنارے میں کشیدگی میں اضافہ قابض حکومت کو جلا کر رکھ دے گا۔