فرانس میں چاقو کے حملے میں 6 بچے زخمی

🗓️ 9 جون 2023

سچ خبریں:سیکورٹی ذرائع نے جمعرات کو اعلان کیا کہ فرانسیسی ایلپس کے شہر انسی میں چاقو کے حملے میں چھ کمسن بچوں سمیت کل سات افراد زخمی ہوئے۔

اے ایف پی کے مطابق مقامی وقت صبح 9 بج کر 45 منٹ پر ایک چاقو بردار شخص نے تین سالہ بچوں کے ایک گروپ پر حملہ کیا جو اس شہر میں ایک جھیل کے قریب ایک پارک میں کھیل رہے تھے

فرانس کے وزیر داخلہ جیرالڈ درمانین نے ایک ٹویٹ میں اعلان کیا کہ حملہ کرنے والے کو گرفتار کر لیا گیا ہے۔ اے ایف پی کے مطابق اس حملے کا ملزم شامی پناہ گزین ہونے کا دعویٰ کرتا ہے۔

ایک سکیورٹی ذریعے نے اے ایف پی کو بتایا کہ متاثرین میں سے کم از کم تین کی حالت تشویشناک ہے۔

فرانسیسی وزیر اعظم الزبتھ بورن کے دفتر نے اعلان کیا کہ وہ جائے وقوعہ پر جائیں گی اور میڈیا میں اس خبر کے شائع ہونے کے بعد فرانسیسی قومی پارلیمنٹ میں موجود نمائندوں نے ایک منٹ کے لیے خاموشی اختیار کی۔

اس واقعے کی مزید تفصیلات اور مجرم کے محرکات ابھی تک جاری نہیں کی گئی ہیں۔