غزہ کو غیر مسلح کرنا فلسطینیوں کی نسل کشی کو آسان بنانے کی سازش ہے:خالد مشعل

 غزہ کو غیر مسلح کرنا فلسطینیوں کی نسل کشی کو آسان بنانے کی سازش ہے:خالد مشعل

حماس کے بیرونِ فلسطین سربراہ خالد مشعل نے غزہ کو غیر مسلح کرنے کے مطالبات کو سختی سے مسترد کرتے ہوئے کہا ہے کہ یہ اقدام فلسطینی عوام کو کمزور بنانے اور ان کی نسل کشی کو آسان بنانے کی دانستہ کوشش ہے۔

الجزیرہ کے مطابق خالد مشعل نے کہا کہ غزہ سے اسلحہ چھیننے کی بات دراصل فلسطینی قوم کو ایک بے بس شکار میں تبدیل کرنے کی سازش ہے تاکہ اسرائیل کے لیے قتلِ عام اور تباہی آسان ہو جائے۔ انہوں نے الزام عائد کیا کہ اسرائیل فلسطینیوں سے اسلحہ لے کر اسے مسلح گروہوں کے حوالے کرنا چاہتا ہے تاکہ اندرونی انتشار، بدامنی اور دہشت پھیلائی جا سکے۔

مشعل نے واضح کیا کہ حماس کسی بھی قسم کی بیرونی سرپرستی، قیمومیت یا مداخلت کو قبول نہیں کرتی۔ انہوں نے امریکہ، یورپی ممالک اور عالمی اداروں سے مطالبہ کیا کہ وہ فلسطین کے مسئلے کو اسرائیلی زاویے کے بجائے ایک منصفانہ اور اصولی نقطۂ نظر سے دیکھیں۔

ان کا کہنا تھا کہ حماس غزہ کی تعمیرِ نو، انسانی امداد کی بلا رکاوٹ فراہمی اور پائیدار استحکام کی خواہاں ہے۔ انہوں نے زور دے کر کہا کہ غزہ میں موجود اسلحہ دفاعی نوعیت کا ہے اور فلسطینی عوام کے تحفظ کے لیے ناگزیر ہے۔

خالد مشعل نے مزید کہا کہ فلسطینیوں کو جبری بے دخلی کے منصوبے کی ناکامی ایک بڑی کامیابی ہے اور اسرائیلی جارحیت کے باوجود فلسطینی قوم اپنی قومی شناخت، حقوق اور مزاحمت پر قائم رہے گی۔