صیہونی حکام غزہ میں اپنے جرائم کے شواہد مٹانے کی کوشش کر رہے ہیں: اقوام متحدہ کی خصوصی نمائندہ

?️ 8 ستمبر 2026

سچ خبریں:اقوام متحدہ کی خصوصی نمائندہ فرانچسکا آلبانیز نے خبردار کیا ہے کہ غزہ سے ملبہ ہٹانے کی صہیونی کوششیں جنگی جرائم کے شواہد ضائع کرنے اور ملبے تلے دبے شہدا کی لاشوں کی شناخت میں رکاوٹ بن سکتی ہیں۔

مقبوضہ فلسطینی علاقوں میں انسانی حقوق کے بارے میں اقوام متحدہ کی خصوصی نمائندہ فرانچسکا آلبانیز نے خبردار کیا ہے کہ غزہ کی پٹی سے ملبہ ہٹانے کی صہیونی حکومت کی ممکنہ کارروائی اس حکومت کی جانب سے فلسطینی شہریوں کے خلاف کیے گئے سنگین جرائم کے اہم شواہد ضائع کر سکتی ہے اور ملبے تلے دبے شہدا کے جسد خاکی نکالنے اور ان کی شناخت کی کوششوں میں رکاوٹ بن سکتی ہے۔

عربی 21 کے مطابق فرانچسکا آلبانیز نے اپنے ایک بیان میں کہا کہ غزہ کی پٹی سے ملبہ ہٹانے کا جامع آپریشن شروع کرنے سے پہلے شواہد اکٹھے کرنا اور متاثرین کی شناخت ضروری ہے۔

 انہوں نے اس بات پر بھی زور دیا کہ ملبہ ہٹانے کے منصوبوں کی تیاری اور ان پر عمل درآمد میں فلسطینیوں کا کردار اور ذمہ داری یقینی بنائی جانی چاہیے۔

اقوام متحدہ کی عہدیدار نے کہا کہ غزہ کا ملبہ ’’صرف تباہ شدہ عمارتوں کا ملبہ نہیں بلکہ جرم کے منظر، قبرستان اور ایک اہم مادی دستاویز کا حصہ ہے۔‘‘

آلبانیز نے مزید بتایا کہ متعدد ذرائع نے انہیں اطلاع دی ہے کہ صیہونی کمپنیاں غزہ سے ملبہ ہٹانے کی کارروائیوں میں حصہ لے رہی ہیں۔

آلبانیز کا یہ انتباہ ایسے وقت میں سامنے آیا ہے جب اقوام متحدہ نے غزہ کی پٹی میں جمع ہونے والے ملبے اور تباہ شدہ ڈھانچوں کی مقدار تقریباً 61 ملین ٹن بتائی ہے۔ اقوام متحدہ نے اندازہ لگایا ہے کہ اس وسیع پیمانے پر تباہی کا ملبہ صاف کرنے میں تقریباً 7 سال لگ سکتے ہیں۔

صہیونی حکومت کی وزارت خارجہ، وزیر اعظم بنیامین نیتن یاہو کے دفتر اور صیہونی فوج کی جانب سے اب تک آلبانیز کے بیانات پر کوئی ردعمل سامنے نہیں آیا۔ یہ تینوں ادارے اس سے قبل غزہ کی پٹی میں صہیونی حکومت کی فوجی کارروائیوں کے حوالے سے آلبانیز کے مؤقف کو کئی مرتبہ سختی سے مسترد کرچکے ہیں۔

دوسری جانب حماس نے آلبانیز کے انتباہ کا خیرمقدم کرتے ہوئے مطالبہ کیا ہے کہ غزہ سے ملبہ اس انداز میں ہٹایا جائے جس سے لاپتا افراد کے جسد خاکی نکالنے اور جرائم کے شواہد محفوظ رکھنے کو یقینی بنایا جاسکے۔

اسی سلسلے میں غزہ کی پٹی کی وزارت صحت نے اعلان کیا ہے کہ غزہ کے خلاف صہیونی حکومت کی جارحیت کے دوران 73000 سے زائد فلسطینی شہید ہوچکے ہیں۔

فلسطینی حکام کا اندازہ ہے کہ 8000 سے زائد شہدا اب بھی ملبے تلے دبے ہوئے ہیں۔ گزشتہ ماہ غزہ شہر میں ملبہ تلاش کرنے والی ایک فلسطینی ٹیم نے ایک ہی خاندان کے 112 افراد کے جسد خاکی برآمد کیے تھے۔