سچ خبریں:یمنی قومی نجات حکومت کے وزیر اعظم نے اپنی تقریر میں اس بات پر زور دیاکہ سعودی امریکی اتحاد فی الحال یمنی جنگ سے عزت کے ساتھ خارج ہونے کا خواہاں ہے۔
المیادین چینل کی رپورٹ کے مطابق یمنی قومی نجات حکومت کے وزیر اعظم عبدالعزیز بن حبتورنے سعودی اتحاد کے بارے میں بات کرتے ہوئے کہا کہ سعودی امریکی اتحاد یمن کی جنگ سے با وقار اخراج کا خواہاں ہے، رپورٹ کے مطابق یمنی عہدیدار نے مزید کہاکہ سعودی اتحاد کو بخوبی اندازہ ہے کہ یمنی عوام پر شکست مسلط کرنا ممکن نہیں ہے، لہذا یہ اتحاد یمن میں موجودہ جنگ سے نکلنے کا راستہ تلاش کر رہا ہے۔
بن حبتورنے مزید کہاکہ حقیقت یہ ہے کہ جارح ممالک کو یمن کے خلاف سعودی اتحاد کے فریم ورک کے اندر شکست کا سامنا کرنا پڑا ہےلہذا وہ اپنی کھوئی ہوئی ساکھ دوبارہ حاصل کرنا چاہتے ہیں، عمانی وفد کے صنعا کے دورے کے بارے میں انہوں نے کہاکہ یہ دورہ یمن میں قومی اور زمینی سطح پر اقدامات کرنے میں مدد کرنے کے لئے کیا گیا ہے،واضح رہے کہ اس سے قبل عمانی ذرائع نے یمن کے خلاف سات سال سے جاری اور اس صدی کی سب سے زیادہ انسانیت سوز تباہی کرنے والی سعودی جنگ کے مستقبل کے بارے میں سعودی ولی عہد شہزادہ محمد بن سلمان کے ایک خصوصی خط کے مضمون کا انکشاف کیا ۔
خط میں انکشاف کیا گیا ہے کہ اس خط میں صنعا بین الاقوامی ہوائی اڈ ےاور الحدیدہ بندرگاہ دوبارہ کھولنے کی تیاری نیز مأرب میں یمنی فوج اور عوامی کمیٹیوں کے حملوں کو روکنے کے بدلے میں یمنیوں کو فوری مدد فراہم کرنے اورسعودی عرب پر ہونے والے ڈرون حملوں کو روکنےکے بارے میں بات کی گئی ہے۔
قابل ذکر ہے کہ یمن کی انصار اللہ کے رہنما عبد الملک بدرالدین الحوثی نے پیر کی شام سلطان عمان کے وفد سے ملاقات کی اور وفد کے ممبروں سے انسانی مسائل اور دیگر امور پر تبادلہ خیال کیا۔
