امریکہ نے سوڈان کی جنگ کے لیے کلمبیائی جنگجو بھرتی کرنے والا نیٹ ورک  پابندیاں عائد کر دیں

?️ 10 دسمبر 2025

امریکہ نے سوڈان کی جنگ کے لیے کلمبیائی جنگجو بھرتی کرنے والا نیٹ ورک  پابندیاں عائد کر دیں

امریکی وزارتِ خزانہ نے ایک ایسے بین الاقوامی نیٹ ورک کو پابندیوں کی فہرست میں شامل کر لیا ہے جس پر الزام ہے کہ وہ کلمبیائی شہریوں کو سوڈان کی خانہ جنگی میں لڑنے کے لیے بھرتی کر رہا تھا۔

وزارتِ خزانہ کے مطابق منگل کے روز چار افراد اور چار اداروں پر پابندیاں عائد کی گئیں جو مبینہ طور پر جنگ زدہ ملک سوڈان میں متحارب گروہوں کے لیے جنگجو بھرتی کرنے میں ملوث تھے۔

بیان میں کہا گیا کہ یہ نیٹ ورک، جو زیادہ تر کلمبیا کے شہریوں اور کمپنیوں پر مشتمل ہے، سابق کلمبیائی فوجیوں کو بھرتی کرتا ہے اور حتیٰ کہ بچوں سمیت دیگر افراد کو تربیت دیتا ہے تاکہ وہ سوڈان  میں باغی گروہ ’ریپڈ سپورٹ فورسز‘ (RSF) کی جانب سے لڑ سکیں۔

وزارتِ خزانہ کے معاون سیکریٹری برائے دہشت گردی و مالیاتی انٹیلیجنس جان ہرلی نے کہا کہ ’’ریپڈ سپورٹ فورسز بارہا ثابت کر چکی ہے کہ وہ عام شہریوں، حتیٰ کہ کم سن بچوں کو بھی نشانہ بنانے سے نہیں ہچکچاتی۔ ان کی یہ تشدد آمیز سرگرمیاں نہ صرف تنازع کو طول دیتی ہیں بلکہ پورے خطے کو عدم استحکام کی طرف دھکیل رہی ہیں، جس سے دہشت گرد گروہوں کے لیے جگہ بن رہی ہے۔‘‘

امریکی حکومت کے مطابق یہ نیٹ ورک اس خانہ جنگی کو مزید بھڑکا رہا ہے جسے واشنگٹن ’’دنیا کا بدترین جاری انسانی بحران‘‘ قرار دیتا ہے۔

بیان میں مزید کہا گیا کہ واشنگٹن 12 ستمبر کے مشترکہ اعلامیے کے اصولوں پر قائم ہے، جس میں سودان میں تین ماہ کی انسانی بنیادوں پر جنگ بندی، پھر مستقل فائر بندی اور آخرکار ایک شفاف عبوری عمل کے ذریعے غیر عسکری، آزاد حکومت کے قیام کی حمایت کی گئی ہے۔

اعلامیے میں تمام بیرونی فریقوں سے مطالبہ کیا گیا ہے کہ وہ متحارب گروہوں کو کسی قسم کی مالی یا عسکری مدد فراہم کرنے سے گریز کریں۔

امریکا کے نئے فیصلے کے تحت پابندیوں کا سامنا کرنے والے تمام افراد اور اداروں کے اثاثے اور مفادات امریکا میں یا امریکی شہریوں کے کنٹرول میں بلاک کر دیے جائیں گے۔ اسی طرح وہ تمام ادارے بھی پابندیوں کی زد میں آئیں گے جن میں ان افراد کا 50 فیصد یا اس سے زیادہ حصہ ہے۔

سودان میں اپریل 2023 سے جاری فوج اور ریپڈ سپورٹ فورسز کے درمیان جھڑپوں نے اب تک ہزاروں جانیں لے لی ہیں اور لاکھوں افراد کو ملک کے اندر بے گھر کر دیا ہے۔