امریکہ اور اسرائیل کے ساتھ سمجھوتہ امت اسلامیہ کے لیے سب سے بڑا خطرہ:الحوثی

?️ 16 فروری 2022

سچ خبریں:یمن کی عوامی تنظیم انصار اللہ کے سربراہ عبد المالک الحوثی کچھ عرب ممالک کے اسرائیل کے ساتھ تعلقات بحال کرنے پر انتباہ دیتے ہوئے کہا کہ اسلامی امت کے لیے سب سے بڑا خطرہ امریکہ اور اسرائیل کے ساتھ سمجھوتہ کرنا ہے۔
المسیرہ ٹی وی چینل کی رپورٹ کے مطابق یمن کی انصار اللہ کے سربراہ سید عبد الملک البدر الدین الحوثی نے الجوبہ اور العبدیہ نامی قبائل کے وفود سے ملاقات کے دوران کہا کہ اسلامی امت کے لیے سب سے بڑا خطرہ امریکہ اور اسرائیل کے ساتھ سمجھوتہ کرنا ہے ، انہوں نے کہا کہ اس وقت دشمن کی کوشش یہ ہے کہ وہ امت اسلامیہ کے اندر اپنا اثر و رسوخ بڑھائے اور اسی تناظر میں وہ سعودی عرب اور متحدہ عرب امارات کی حکومتوں کو اپنے مقاصد کے لئے استعمال کر رہا ہے۔

یمنی حکومت کے نگران اعلیٰ کا کہنا تھا کہ ہماری کوشش یہ ہے کہ اُن لوگوں کو آگاہ کیا جائے جو فتنہ پروروں کے بہکاوے میں آکر امریکہ و اسرائیل کی خدمت میں مصروف ہیں، الحوثی نے مزید کہا کہ جو بھی جنگِ یمن میں سعودی عرب اور عرب امارات کا ساتھ دے گا وہ درحقیقت امریکی و صیہونی اتحادیوں کا ساتھ دے رہا ہے۔

خیال رہے کہ یمن پر مارچ دوہزار پندرہ سے سعودی عرب اور اسکے اتحادیوں کی بہیمانہ جارحیت کا سلسلہ جاری ہے جس کے باعث ایک طرف جہاں لاکھوں یمنی شہری اب تک شہید و زخمی ہو چکے ہیں وہیں دوسری طرف اس ملک کی پچاسی فیصد سے زائد بنیادی تنصیابت تباہ کر دی گئی ہیں اور اس وقت یمن کو صدی کے بدترین انسانی المیہ کا سامنا ہے۔