اسرائیل کی جنگ کو بھڑکانے کے لئے نئی فوجی ٹیکنالوجی

?️ 2 دسمبر 2025

اسرائیل کی جنگ کو بھڑکانے کے لئے نئی فوجی ٹیکنالوجی

اسرائیلی وزارت جنگ کے ڈائریکٹر جنرل نے آج صبح تل ابیب یونیورسٹی میں منعقدہ ایک کانفرنس میں اعلان کیا کہ اسرائیل غیر معمولی رفتار سے ہتھیاروں کی نئی اور پیشرو نسل کی صلاحیتیں تیار کر رہا ہے اور ان پیش رفتوں کو اس نے خطے میں موجود اور مستقبل کے خطرات کے مقابلے میں اپنی “تزویراتی بقا کی کنجی” قرار دیا ہے۔

اسرائیلی اخبار معاریو کے مطابق، ایسے وقت میں جب غزہ، لبنان اور شام میں صہیونی کارروائیاں اپنے عروج پر ہیں، اسرائیلی وزارت جنگ کے ڈائریکٹر جنرل امیر برعم نے بین الاقوامی کانفرنس “ہفتہ دفاع اور عسکری ٹیکنالوجی 2025” کی افتتاحی نشست میں اسرائیل کے وسیع منصوبوں کا ذکر کیا جن کا مقصد جدید فوجی ٹیکنالوجیوں کی ترقی ہے۔ یہ کانفرنس تل ابیب یونیورسٹی کے بلاواتنیک سائبر ریسرچ سینٹر کے تعاون سے منعقد کی گئی ہے اور عملی جنگی حالات میں ٹیکنالوجی کے استعمال پر توجہ دیتی ہے۔ ماہرین کے مطابق، اس سے اسرائیل کی اس حکمت عملی کی جھلک ملتی ہے جس کے تحت وہ مصنوعی ذہانت کے ذریعے اپنی عسکری برتری برقرار رکھنا چاہتا ہے۔

اپنی تقریر میں برعم نے اسرائیل کی فوجی ٹیکنالوجی کو منفرد قرار دیتے ہوئے جدید دفاعی نظاموں، خودکار ہتھیاروں، جنگِ الیکٹرانیک، کوانٹم ٹیکنالوجی، اعلیٰ سطح کے اطلاعاتی و سائبر سسٹمز اور خلائی صلاحیتوں تک کی فہرست پیش کی۔ انہوں نے کہا کہ یہ ٹیکنالوجیاں صرف دفاع کے لیے نہیں بلکہ ایران کے ساتھ مستقبل میں ممکنہ دفاعی اور جارحانہ رویارویی کے لیے تیار کی جا رہی ہیں تاکہ خطے میں بدلتی ہوئی جغرافیائی و تزویراتی صورتحال کے مقابلے کی صلاحیت برقرار رہے۔

مدیر کل کی یہ باتیں ایک ایسے پس منظر میں سامنے آئیں جب اسرائیل خود کو مستقل سکیورٹی خطرات میں گھرا ہوا بتاتا ہے اور اس ماحول کو عسکری توسیع اور جنگی تیاریوں کے لیے بنیاد کے طور پر استعمال کرتا ہے۔ تجزیہ کاروں کے نزدیک تل ابیب کی اس پالیسی کا مقصد اپنی عسکری برتری اور علاقائی نفوذ کو مزید تقویت دینا ہے۔

برعم نے بتایا کہ صرف 2024 میں اسرائیل نے بین الاقوامی دفاعی شعبے میں 21 معاہدے کیے جن کی مالیت اربوں شیکل بنتی ہے، جن میں سے 1.2 ارب شیکل تقریباً 320 ملین ڈالر دفاعی اسٹارٹ اپس میں لگائے گئے۔ تین سو سے زیادہ کمپنیوں نے وزارت جنگ کے ساتھ تعاون کیا جن میں سے 130 نے حالیہ جنگوں میں براہ راست عملی کردار ادا کیا۔

انہوں نے اسرائیل کو دنیا کا “تیسرا بڑا فوجی ٹیکنالوجی مرکز” بھی قرار دیا اور یورپ، ایشیا اور شمالی امریکہ کی بڑی کمپنیوں کے ساتھ ہونے والے معاہدوں کا حوالہ دیا۔ ان کا کہنا تھا کہ اسٹارٹ اپس کی بڑھتی ہوئی تعداد، سرکاری ضمانتوں اور بھاری مالی معاونت کے ذریعے ممکن ہوئی ہے۔ ناقدین کے مطابق، اسرائیل کی عسکری ترجیحات اس بات کی نشاندہی کرتی ہیں کہ تل ابیب مستقبل میں بڑے علاقائی تصادم کے لیے خود کو تیار کر رہا ہے۔

برعم نے دعویٰ کیا کہ اسرائیل کی موجودگی اور سلامتی ہمیشہ خطرے میں رہتی ہے اور اس صورتحال کو انہوں نے اسرائیل کے لیے “بڑی تزویراتی فرصت” قرار دیا۔ ان کے مطابق، جو لوگ اس حقیقت کو تسلیم نہیں کریں گے وہ پیچھے رہ جائیں گے۔ انہوں نے ایران کے خلاف نئی نسل کی عسکری ٹیکنالوجیوں کی تیاری پر خصوصی زور دیا۔

یہ دو روزہ کانفرنس وزارت جنگ کے سائبر سکیورٹی سینٹر کا دوسرا بین الاقوامی اجلاس ہے اور میدانی نوعیت کی جدتوں پر مبنی ہے۔ انسانی حقوق کی تنظیموں اور ناقدین نے ان پیش رفتوں کو جنگ افروزی کی نئی شکل قرار دیا ہے، کیونکہ ڈرونز، خودکار ہتھیاروں اور سائبر سسٹمز جیسے ٹیکنالوجی پر مبنی آلات نے اسرائیل کی حالیہ غزہ اور لبنان جنگ میں بڑے پیمانے پر تباہی اور ہلاکتوں میں اہم کردار ادا کیا تھا۔