مجھ سے شادی کے بعد عورتیں میرے شوہر کے پیچھے پڑ گئیں، اشنا شاہ

?️ 20 دسمبر 2023

کراچی: (سچ خبریں) معروف اداکارہ اشنا شاہ نے کہا ہے کہ ان کی شادی کے بعد ان کے شوہر کو شہرت ملی تو عورتیں پیچھے ہٹنے کے بجائے ’بے غیرت‘ ہو کر ان کے پیچھے پڑ گئیں۔

اشنا شاہ نے فروری 2023 میں معروف گالفر حمزہ امین سے شادی کی تھی، جس کے بعد وہ کچھ عرصے سے اسکرین سے غائب ہیں لیکن جلد ہی وہ بڑے پردے پر دکھائی دیں گی۔

اشنا شاہ حال ہی میں ’ایف ایچ ایم پوڈکاسٹ‘ میں شریک ہوئیں، جہاں انہوں نے مختلف معاملات پر گفتگو کی۔

اداکارہ کی پوڈکاسٹ کی وائرل ہونے والی ایک ویڈیو میں وہ لڑکیوں اور لڑکوں کے درمیان تعلقات سمیت شادی اور دیگر معاملات پر بات کرتی دکھائی دیتی ہیں۔

وائرل ہونے والی ویڈیو میں اشنا شاہ بتاتی نظر آتی ہیں کہ زیادہ تر لڑکے دھوکے باز ہوتے ہیں، وہ لڑکیوں کے دل توڑتے ہیں۔

اداکارہ نے اعتراف کیا کہ انہوں نے بھی بہت سارے لڑکوں کے دل توڑے، ساتھ ہی انہوں نے مسکراتے ہوئے کہا کہ ان کی ایسی باتیں کسی نہ کسی کو ان کے شوہر کو بتانی چاہیے تھیں۔

اشنا شاہ کا کہنا تھا کہ کسی کو ان کے شوہر کو بتانا چاہیے تھا کہ وہ ان سے پہلے ایسے کام کرتی رہی ہیں۔

وائرل ہونے والی ویڈیو میں اشنا شاہ نے یہ دعویٰ بھی کیا کہ جب ان کی شادی ہوئی تو ان کے شوہر کے موبائل فون کا کوئی پاس ورڈ نہیں تھا، انہوں نے شوہر کو پاس ورڈ لگانے کا کہا۔

ان کا کہنا تھا کہ ان کے شوہر نے اپنے فون پر ان کے چہرے کا لاک اسکرین بھی لگایا ہوا ہے۔

ایک سوال کے جواب میں اشنا شاہ کا کہنا تھا کہ ان سے شادی کے بعد ان کے شوہر مشہور ہوگئے ہیں، وہ توجہ کا مرکز بنے ہوئے ہیں۔

انہوں نے کہا کہ ان کے شوہر کے مشہور ہونے کی وجہ سے خواتین کو ان سے دور رہنا چاہیے تھا لیکن حیران کن طور پر عورتیں اور ’بے غیرت‘ ہوگئیں۔

اسی بات پر اشنا شاہ مسکراتی دکھائی دیں اور کہا کہ خواتین ان کے شوہر سے یہ جھوٹ بھی بولتی ہیں کہ انہوں نے پہلے ان کی بیوی کو بھی میسیج کیا تھا۔

اداکارہ کی وائرل ہونے والی ویڈیو پر لوگوں نے کمنٹس کرتے ہوئے جہاں ان کی تعریفیں کیں، وہیں صارفین نے ان پر تنقید بھی کی۔