عاطف اسلم سنگ ماہ میں اداکاری کے لئے تیار

🗓️ 19 ستمبر 2021

کراچی (سچ خبریں) گلوکار عاطف اسلم نے بیان جاری کرتے ہوئے اس بات کی تصدیق کی ہے کہ وہ  مقبول ڈرامے ’سنگِ مرمر’ کے سیکوئیل ’سنگِ ماہ’ سے چھوٹی اسکرین پر قسمت آزمانے کے لئے تیار ہیں انہوں نے سوشل میڈیا اکاؤنٹس پر ایک ویڈیو بیان جاری کر تے ہوئے مداحوں کو اپنے آنے والے پروجیکٹس سے متعلق بتایا۔

خیال رہے کہ ‘سنگِ ماہ’، نجی چینل پر 2016 میں نشر ہونے والے ڈرامے ‘سنگِ مر مر’ کا سیکوئل ہے جس میں کبریٰ خان، ثانیہ سعید، نعمان اعجاز اور میکال ذوالفقار نے اداکاری کی تھی۔گزشتہ کئی ماہ سے سوشل میڈیا پر یہ خبریں گردش کررہی تھیں کہ عاطف اسلم چھوٹی اسکرین پر ڈیبیو کرنے جارہے ہیں جس کے بعد اگست میں اداکار نعمان اعجاز نے بھی ان کے ڈرامے کا حصہ بننے سے متعلق بتایا تھا۔

تاہم عاطف اسلم کی جانب سے کوئی بیان سامنے نہیں آیا تھا اور مداحوں کے طویل انتظار کے بعد انہوں نے اپنا باضابطہ بیان جاری کیا ہے۔عاطف اسلم نے اپنے سوشل میڈیا اکاؤنٹس پر ایک ویڈیو بیان جاری کر تے ہوئے مداحوں کو اپنے آنے والے پروجیکٹس سے متعلق بتایا۔

انہوں نے ڈرامے کے سیٹ سے بنائی گئی ویڈیو میں بتایا کہ وہ ’سنگ ماہ‘ کے سیٹ سے گفتگو کررہے ہیں اور کہا کہ’ہاں میں ڈراما سیریل میں کام کررہا ہوں اورمجھے آپ کی دعاوں کی ضرورت ہے‘۔عاطف اسلم نے کہا کہ ’جس طرح سے ہمیشہ آپ لوگوں نے مجھے پیاردیا، میں دعا کرتا ہوں کہ ہمیشہ اسی طرح میراساتھ دیں گے۔