یوٹیوبر زیبا وقار منجھے ہوئے سیاست دانوں کے خلاف انتخابی میدان میں اتریں گی

24 جنوری 2024

لاہور: (سچ خبریں) یوٹیوبر، اسلامی مبلغ اور ڈاکٹر زیبا وقار پنجاب کے دارالحکومت لاہور کے حلقہ قومی اسمبلی این اے 122 سے منجھے ہوئے سیاست دانوں کے خلاف انتخابی میدان میں اتریں گی۔

ڈان اخبار کی رپورٹ کے مطابق زیبا وقار وڑائچ قومی اسمبلی کے حلقہ سے پاکستان مسلم لیگ (ن) کے خواجہ سعد رفیق اور پاکستان تحریک انصاف (پی ٹی آئی) کے لطیف کھوسہ کے مد مقابل انتخاب لڑیں گی۔

زیبا وقار پہلی بار انتخابی میدان میں اتریں، وہ مذہبی پارٹی جماعت اسلامی کے ٹکٹ پر قومی اسمبلی کے حلقہ میں اتریں گی۔

ان کے شوہر وقار ندیم وڑائچ بھی سیاست دان ہیں اور وہ طویل عرصے سے جماعت اسلامی سے وابسہ ہیں لیکن زیبا وقار پہلی بار انتخابی میدان میں اتریں گی۔

زیبا وقار وڑائچ یوٹیوب پر مذہبی خطابات کی ویڈیوز شیئر کرتی ہیں ان کے وہاں پر 18 ہزار کے قریب سبسکرائبرز ہیں جب کہ فیس بک سمیت دیگر سوشل میڈیا پلیٹ فارمز پر بھی ان کی بہت بڑی فین فالوؤنگ ہے۔

علاوہ ازیں زیبا وقار نے النسا اسلامک انسٹی ٹیوٹ کے نام سے پاکستان بھر میں لڑکیوں اور خواتین کے لیے مذہبی سمیت جدید تعلیم کے ادارے کھول رکھے ہیں، جہاں خواتین کو رہائش اور کھانا بھی مفت فراہم کیا جاتا ہے۔

پہلی بار انتخابی میدان میں اترنے والی زیبا وقار پیشے کے لحاظ سے گائناکالوجسٹ ڈاکٹر ہیں اور انہوں نے کئی سال تک ماہر نسوانی امراض کے طور پر خدمات بھی سرانجام دیں اور اب بھی وہ غریب افراد کو صحت سے متعلق مفت مشورے بھی دیتی دکھائی دیتی ہیں۔

زیبا وقار اپنے یوٹیوب سمیت دیگر سوشل میڈیا پلیٹ فارمز کو بھی اپنی انتخابی مہم کے لیے استعمال کرتی دکھائی دیتی ہیں۔