کُرم میں فساد کرنے والے بچ نہیں سکتے، کسی کو نہیں چھوڑیں گے، وزیراعلیٰ خیبرپختونخواہ

19 فروری 2025

پشاور: (سچ خبریں) وزیراعلیٰ خیبرپختونخواہ علی امین گنڈاپور کا کہنا ہے کہ کُرم میں فساد کرنے والے بچ نہیں سکتے، کسی کو نہیں چھوڑیں گے۔ تفصیلات کے مطابق وزیراعلیٰ علی امین گنڈاپور نے پشاور میں تقریب سے خطاب کرتے ہوئے کہا کہ کُرم کا مسلئہ سو سال سے زائد عرصے سے چلا آرہا ہے، کُرم میں زمینی تنازع نہیں بلکہ فرقہ ورانہ مسلئہ ہے، ہمیں لسانیت اور فرقہ واریت میں الجھایا گیا ہے، وہاں بیرونی قوتیں سرمایہ کاری کررہی ہیں، کُرم روڈ کو محفوظ کرکے سی سی ٹی وی کیمرے نصب کررہے ہیں، کُرم میں فساد کرنے والے نہیں بچ سکتے، ہم سخت کاروائی کریں گے اور کسی کو نہیں چھوڑیں گے۔

علی امین گنڈاپور کہتے ہیں کہ ملک اور صوبوں کے اکانومی کو منظم کرنا ضروری ہوتا ہے، ہم نے خود مختار ہونا ہے اور رزق حلال کمانا ہے، صوبے میں انڈسٹری شروع کرنے پر زیادہ سہولتیں دی جائیں گی، رقم منتقلی سے متعلق اوورسیز کے لیے مزید سہولیات فراہم کریں گے، خیبر بینک کے ذریعے اوورسیز اب آسانی سے رقم منتقل کرتے ہیں، خیبر بینک میں نظام کو اسلامی بینکنگ پر منتقل کررہے ہیں، عوام خیبر بینک کے تمام سہولیات سے فائدہ اُٹھائیں۔

بتایا جارہا ہے کہ خیبرپختونخوا حکومت نے ضلع کرم میں بگڑتی ہوئی امن و امان کی صورتحال کے پیش نظر لوئر کرم کے چار دیہات خالی کرانے کا فیصلہ کیا ہے، ان علاقوں میں شرپسند عناصر کے خلاف سرچ آپریشن کیے جائیں گے، اوچت، مندوری، دادکمر اور بگن نامی دیہات خالی کروا کر وہاں موجود مسلح عناصر کے خلاف کارروائی کی جائے گی۔ معلوم ہوا ہے کہ اعلیٰ سطح کے حکومتی اجلاس میں عوام کے تحفظ کو یقینی بنانے اور ملزمان و ماسٹر مائنڈز کے سروں کی قیمت مقرر کرنے کا فیصلہ کیا گیا، اس کے علاوہ ضلع میں موجود بنکرز کی مسماری کا عمل بھی تیزی سے جاری رہے گا، کوہاٹ امن معاہدے کے بعد بنکرز کے خلاف آپریشن جاری ہے جس کے تحت اب تک ضلع بھر میں 194 بنکرز مسمار کیے جا چکے ہیں، لوئر کرم کے گاؤں بالش خیل اور خارکلی میں 117 بنکرز کو مسمار کیا گیا، اپر کرم کے پیوار اور تری منگل میں 77 بنکرز گرائے جا چکے ہیں۔