کسی مائی کے لال میں ہمت ہے تو او آئی سی کانفرنس روک کردکھائے:وزیرداخلہ

?️ 19 مارچ 2022

اسلام آباد(سچ خبریں)وزیرداخلہ شیخ رشید احمد نے کہا ہے کہ کسی مائی کے لال میں ہمت ہے تو او آئی سی کانفرنس روک کردکھائے۔انہوں  نے کہا کہ او آئی سی کانفرنس ملکی سلامتی کا مسئلہ ہے، اجلاس میں شرکت کرنے والے اراکین ہمارے مہمان ہیں اور پاک فوج نے سیکیورٹی کی ذمہ داری سنبھالی ہوئی ہے۔

سوال کے جواب میں وفاقی وزیرداخلہ شیخ رشید نے کہا کہ ہم بڑے پیار سے اپوزیشن سے نمٹیں گے، کسی کی یہ اوقات نہیں کہ او آئی سی کانفرنس روک سکیں۔ یہ الیکشن ہار رہے ہیں اور عوام کے سامنے ایکسپوز ہوچکے ہیں، انکی سب سے بڑی حماقت تھی کہ اپنے بندوں کی ویڈیو بنوا کر سامنے لے آئے۔

وفاقی وزیر داخلہ شیخ رشید نے کہا ہے کہ اپوزیشن میں ہمت ہے تو او آئی سی کانفرنس روک کردکھائیں،پھر ان کے ساتھ وہ ہو گا کہ ان کی نسلیں یاد رکھیں گی ۔ واضح رہے کہ بلاول بھٹو نے بیان دیا کہ پیر کو اگر عدم اعتماد کی تحریک پیش نہ ہوئی تو دیکھتے ہیں کہ پھر او آئی سی کانفرنس کیسے ہوتی ہے۔اس پر رد عمل دیتے ہوئے شیخ رشید نے کہاکہ بطور وزیر داخلہ کہتاہوں ان کےساتھ وہ ہوگی کہ اپنی نسلوں کو نصیحت کرکےجائیں گے۔ان کا کہنا تھا کہ قومی سلامتی کے مسئلوں پر اس طرح کے باتیں نہیں کی جاتیں۔

 پاکستان پیپلزپارٹی کے چیئرمین بلاول بھٹو نے دھمکی دی تھی کہ اگر پیر کو عدم اعتماد کی تحریک نہیں آنے دی جاتی تو وہیں دھرنے پر بیٹھ جائیں گے، دیکھتے ہیں کیسے او آئی سی کانفرنس منعقد ہوتی ہے۔

دوسری جانب وزیر خارجہ شاہ محمود قریشی کا کہنا تھا کہ بلاول نے نہایت ناسمجھی اور بوکھلاہٹ والا بیان دیا ہے، ان کے نمبرز پورے ہیں تو انہیں پُراعتماد اور پریشان تو ہمیں ہونا چاہیے تھا، لیکن پریشان ان کے چہرے ہیں۔