پی ٹی آئی کا پورا فوکس تعلیم کے فروغ پر ہے: بزدار

18 اگست 2021

لاہور (سچ خبریں) وزیراعلی عثمان بزدار نے کہا ہے کہ پی ٹی آئی کا پورا فوکس تعلیم کے فروغ پر ہے، تونسہ میں یونیورسٹی کا جلد آغاز کیا جائے گا، وزیراعلی آفس کے دروازے طلباء و طالبات کے لئے کھول دیئے، وزیراعلی کی دعوت پر تونسہ کے سرکاری سکولز کی طالبات نے لاہور کا مطالعاتی دورہ کیا۔

وزیراعلی عثمان بزدار کی خصوصی دعوت پر پنجاب کے پسماندہ ترین علاقے تونسہ کی طالبات نے وزیراعلی آفس کا وزٹ کیا، وزیراعلی آفس آمد پر طالبات کو خصوصی پروٹوکول دیا گیا۔ طالبات کو مرکزی کمیٹی روم میں صوبائی وزراء اور سیکرٹریز کے لئے مخصوص نشستوں پر بٹھایا گیا۔ وزیراعلی عثمان بزدار کی خصوصی ہدایت پر طالبات کو وزیراعلی کے آفس اور ڈرائنگ روم کا بھی وزٹ کرایا گیا۔

وزیراعلی عثمان بزدار سے گورنمنٹ گرلز ہائر سیکنڈری سکول اور گورنمنٹ سٹی گرلز ہائی سکول تونسہ کی طالبات اور اساتذہ نے ملاقات کی، وزیراعلی سردار عثمان بزدار کا اس موقع پر کہنا تھا کہ سرکاری سکولز کے طلباء و طالبات کو باقاعدگی سے مطالعاتی دورے پرلاہوربلایا جائے گا۔

وزیراعلیٰ پنجاب عثمان بزدار کا کہنا ہے کہ پاکستان تحریک انصاف کا پورا فوکس تعلیم پر ہے۔ عثمان بزدار کی دعوت پر تونسہ کی طالبات نے لاہور کا مطالعاتی دورہ کیا۔اس موقع پر عثمان بزدار نے کہا کہ تونسہ میں سڑکیں اور پارکوں کی بحالی اور مرمت کر رہے ہیں، پاکستان تحریک انصاف کا پورا فوکس تعلیم پر ہے۔انہوں نے کہا کہ تونسہ میں یونیورسٹی کا جلد آغاز کر دیا جائے گا، فورٹ منرو کیڈٹ کالج کا ادھورا منصوبہ مکمل کر رہے ہیں۔