پی ٹی آئی والے ابھی کسی غلط فہمی میں ہیں۔ طلال چوہدری

?️ 9 دسمبر 2025

اسلام آباد (سچ خبریں) وفاقی وزیرِ مملکت برائے داخلہ سینیٹر طلال چوہدری نے کہا ہے کہ سیاسی لوگوں کی بانی کی نظر میں کوئی وقعت نہیں، پی ٹی آئی والے ابھی کسی غلط فہمی میں ہیں۔

طلال چوہدری نے کہا کہ یہ لوگ خود بانیٔ پی ٹی آئی سے ملاقات کرنا نہیں چاہتے۔ انہوں نے کہا کہ ملاقات کے لیے قانون میں دیے تقاضے پورے نہیں کیے جاتے، پی ٹی آئی خود صورتِ حال اس طرف لے جا رہی ہے کہ سیاسی شہید بن جائے۔ وفاقی وزیر نے کہا کہ ان کی پارلیمانی پارٹی نے ضمنی الیکشن لڑنے کا فیصلہ کیا، حکم آیا کہ نہیں لڑیں گے، پی ٹی آئی کی پارلیمانی کمیٹی کی کوئی سیاسی وقعت نہیں۔

اُن کا کہنا ہے کہ ہم چاہتے ہیں کہ یہ سیاسی عمل کا حصہ بنیں، بانیٔ پی ٹی آئی ایسا نہیں چاہتے، سیاسی لوگوں کی بانی کی نظر میں کوئی وقعت نہیں۔ طلال چوہدری نے کہا کہ پی ٹی آئی والے ابھی کسی غلط فہمی میں مبتلا ہیں، سیاسی جماعت سیاسی طریقے کے بجائے کسی اور طریقے سے چلے تو ایسا نہیں ہونے دیں گے۔

انہوں نے کہا کہ بانی کی سوچ ہے وہ پاکستان میں سری لنکا، بنگلا دیش، نیپال جیسا ماحول چاہتے ہیں، پی ٹی آئی کی بقا اسی میں ہے جیسا بانیٔ ایم کیو ایم کے ساتھ ہوا۔