نواز شریف لندن میں ہیں، سعودی پہنچنے کی خبروں میں کوئی صداقت نہیں، عرفان صدیقی

?️ 10 اکتوبر 2023

لاہور: (سچ خبریں) مسلم لیگ(ن) کے رہنما اور سینیٹر عرفان صدیقی نے نواز شریف کی سعودی عرب پہنچ جانے کی خبروں کی تردید کرتے ہوئے کہا ہے کہ نواز شریف اس وقت لندن میں ہیں اور کل سعودی عرب کے لیے روانہ ہوں گے۔

مسلم لیگ(ن) کے رہنما سینیٹر عرفان صدیقی نے صحافیوں سے گفتگو کرتے ہوئے کہا کہ میاں نواز شریف کے سعودی عرب پہنچ جانے کی خبروں میں صداقت نہیں اور وہ اس وقت لندن میں ہیں۔

انہوں نے کہا کہ کل 11 اکتوبر کو لندن سے براہ راست سعودی عرب جائیں گے اور ان کی سعودی عرب میں اعلیٰ حکام سے ملاقاتیں طے نہیں ہیں۔

ان کا کہنا تھا کہ مسلم لیگ(ن) کے قائد کا یہ نجی دورہ ہو گا اور وہ قائد مسلم لیگ سعودی عرب میں عمرے کی ادائیگی کریں گے جبکہ ان کا زیادہ قیام مدینہ منورہ میں ہو گا۔

عرفان صدیقی نے کہا کہ قائد مسلم لیگ سعودی عرب میں کچھ وقت اپنے بیٹے حسین نواز کے ساتھ گزاریں گے اور 21 اکتوبر سے 2 روز قبل متحدہ عرب امارت پہنچیں گے جس کے بعد وہ امارات سے پاکستان کے لیے روانہ ہوں گے

انہوں نے واضح کیا کہ قائد مسلم لیگ قطر اور چین کا دورہ نہیں کریں گے البتہ ان کے دونوں ممالک سے ذاتی اور سفارتی رابطے ہیں۔

مسلم لیگ(ن) کے رہنما نے مزید کہا کہ نواز شریف کا قطر کے دورے کا کوئی منصوبہ نہیں ہے، ان کی قطر میں کوئی ملاقات طے نہیں جبکہ چین کا بھی کوئی دورہ طے نہیں ہے۔

واضح رہے کہ نواز شریف 2019 میں طبی بنیادوں پر اپنی سات سالہ سزا کے درمیان لندن روانہ ہو گئے تھے، لاہور ہائی کورٹ نے سابق وزیر اعظم کو ابتدائی طور پر چار ہفتوں کے لیے بیرون ملک جانے کی اجازت دی تھی، اس مدت میں میڈیکل رپورٹس کی بنیاد پر توسیع کی گنجائش بھی موجود تھی۔

ان کے چھوٹے بھائی شہباز شریف نے لاہور ہائیکورٹ کے رجسٹرار آفس میں سفارت خانے کی جانب سے نوٹرائزڈ میڈیکل رپورٹس متواتر فراہم کرنے کا حلف نامہ جمع کرایا تھا۔

تاہم نواز شریف کبھی وطن واپس نہیں آئے جنہیں بعد ازاں کرپشن کے مختلف مقدمات میں اشتہاری قرار دے دیا گیا تھا۔

رواں سال 12 ستمبر کو شہباز شریف نے تصدیق کی تھی کہ نواز شریف 21 اکتوبر کو وطن واپس آئیں گے جبکہ ان کی پارٹی نے 30 ستمبر کو کہا تھا کہ نواز شریف وطن واپسی پر ’ہر قسم کے حالات‘ کا سامنا کرنے کے لیے تیار ہیں۔

دریں اثنا، 3 اکتوبر کو مسلم لیگ (ن) پنجاب کے صدر رانا ثنااللہ نے کہا کہ نواز شریف حفاظتی ضمانت کے ساتھ وطن واپس آئیں گے اور لاہور میں استقبال کے بعد عدالت کے سامنے ہتھیار ڈال دیں گے۔

چند دن قبل سابق وزیر اطلاعات اور مسلم لیگ(ن) کی رہنما مریم اورنگزیب نے کہا تھا کہ مسلم لیگ (ن) کے قائد نواز شریف 21 اکتوبر کو لاہور کے مینار پاکستان میں جلسے سے خطاب کے بعد جاتی امرا میں اپنی رہائش گاہ جائیں گے۔