اسلام آباد(سچ خبریں)وزیراعظم عمران خان نے کہا ہےکہ ملکی ترقی کے لئے طویل المدتی پلاننگ ضروری ہے، طویل المدتی منصوبہ بندی نہ ہونے کی وجہ سے ملک تنزلی کا شکار بنا، الیکشن سامنے رکھ کر منصوبہ بندی کریں گے تو ملک آگے نہیں بڑھے گا۔ہمیں آج ہی سے اپنی آئندہ نسلوں کے بارے میں سوچنا ہو گا۔
اسلام آباد میں تقریب سے خطاب کرتے ہوئے وزیراعظم نے کہا کہ ہم پراجیکٹس شروع بھی کردیتےہیں لیکن تکمیل میں تاخیر ہوتی ہے، جب تک طویل مدتی منصوبہ بندی نہ ہو ہم ترقی نہیں کرسکتے، ہر شعبے میں طویل مدتی منصوبہ بندی کی کمی تھی اور طویل مدتی منصوبہ بندی نہ ہونے کی وجہ سےملک پیچھے گیا۔
انہوں نے کہا کہ ہم لانگ ٹرم پالیسی پر ابھی سےعملدرآمد کررہے ہیں، 15 نئے نیشنل پارکس بنا رہے ہیں اور پاکستان میں دس سالوں میں دس نئے ڈیمز بن رہے ہیں، ان ڈیمز سے ماحول دوست بجلی بنے گی جب کہ 10 ہزار میگا واٹ کلین انرجی ملے گی۔
وزیراعظم کا کہنا تھا کہ الیکشن سامنے رکھ کر منصوبہ بندی کریں گے تو ملک آگے نہیں بڑھے گا اس لیے کامیابی کےلیے طویل مدتی پلاننگ ضروری ہے، ہمیں آج سے اپنی آنے والی نسلوں کا سوچنا چاہیے۔عمران خان نے مزید کہا کہ پورے ملک میں یکساں نظام تعلیم لارہے ہیں، صنعتوں کو سب سے زیادہ رعایت دے رہے ہیں۔
انہوں نے کہا کہ 80 کی دہائی تک جب میں بھارت سے کرکٹ کھیل کر پاکستان واپس آتا تھا تو لگتا تھا کہ ایک غریب ترین ملک سے امیر ترین ملک میں آگیا ہوں اس وقت ان دونوں ممالک میں اتنا فرق تھا۔ان کا کہنا تھا 1985 کے بعد ملک نیچے جانا شروع ہوا اور دیکھتے ہی دیکھتے بھارت ہم سے آگے نکلا گیا لیکن سب حیرت انگیز چیز بنگلہ دیش کی ترقی ہے۔