فہمیدہ مرزا نے سندھ کے حکمرانوں کو منشیات فروشوں کا سرپرست قرار دے دیا

?️ 9 جون 2021

اسلام آباد(سچ خبریں)وفاقی وزیر فہمیدہ مرزا نے سندھ کے حکمرانوں کو منشیات فروشوں کا سرپرست قرار دیتے ہوئے کہا  کہ  پیپلز پارٹی نے 17سالوں میں سندھ کا برا حال کردیا ہے، سندھ حکومت نے ایک پیسہ پسماندہ علاقوں کے لیے خرچ نہیں کیا۔

تفصیلات کے مطابق پریس کانفرنس کرتے ہوئے فہمیدہ  مرزا نے کہا کہ سندھ میں  کتوں کے کاٹنے کی ویکسین دستیاب نہیں ہے، جس کی وجہ سے کئی بچوں کی جانیں ضائع ہوئیں،سندھ کابینہ چاہتی ہےکہ وفاق پیسے انہیں دے اور حساب بھی نہ مانگے،سندھ میں وزراء کاطرز زندگی شاہانہ ہےاور عوام بنیادی سہولتوں سے بھی محروم ہیں۔

وفاقی وزیر نے سندھ میں اسکولوں اور اسپتالوں کے حوالے سے گفتگو کرتے ہوئے کہا  کہ سندھ کے اندر اسکولوں اور اسپتالوں میں جانور بندھے ہوئے ہیں، سندھ حکومت خود ڈاکوراج کی سرپرستی کرتی ہے،جو پانی عوام پیتے ہیں سندھ کے وزرا اُس پانی کا ایک گھونٹ بھی پی کر دیکھائیں، تھر اور دادو کی عوام جانوروں سے بھی زیادہ بدترین زندگی گزار رہے ہیں۔

انہوں نے وفاقی حکومت کی جانب سے سندھ کے لئے ترقیاتی منصوبوں کے حوالے سے گفتگو کرتے ہوئے   مزید کہاکہ وفاقی حکومت نے ارساکو کہا ہےکہ سندھ کو حصے کا پانی ملنا چاہیے، وفاقی حکومت نے سندھ میں بے شمار ترقیاتی منصوبے شروع کیے ہیں۔