علیمہ خان پرانڈہ پھینکنےکاواقعہ قابل مذمت، ن لیگ سے کوئی تعلق نہیں۔ بیرسٹر عقیل ملک

?️ 5 ستمبر 2025

اسلام آباد (سچ خبریں) وزیر مملکت برائے قانون و انصاف بیرسٹر عقیل ملک نے کہا ہے کہ علیمہ خان پر انڈہ پھینکنے کے واقعے کی مذمت کرتا ہوں، اس واقعے کا ن لیگ سے کوئی تعلق نہیں ہے۔

بیرسٹر عقیل ملک کا کہنا تھا کہ اکثر بُری روایات تحریک انصاف کے دورمیں ہی پروان چڑھیں، انہوں نے کبھی بھی اپنے رویوں کی مذمت نہیں کی۔ انہوں نے کہا کہ سیاہی،جوتے، انڈے پھینکنے والی تربیت تحریک انصاف کی ہے، خواجہ آصف پر جب سیاہی پھینکی گئی تو پی ٹی آئی والوں نے قہقے لگائے تھے، ہم نے تو انڈہ پھینکنے والے واقعے کی مذمت کی۔

بیرسٹر عقیل ملک کا کہنا تھا کہ انڈہ پھینکنے والی خواتین کا تعلق پی ٹی آئی خیبرپختونخوا سے ہے۔ ایک اور سوال کے جواب میں وزیر مملکت برائے قانون و انصاف نے کہا کہ 25پی ٹی آئی ایم این ایز نے قومی اسمبلی کی قائمہ کمیٹیوں سے استعفے نہیں دیے، یہ تمام افراد حکومت سے بات چیت کے حامی ہیں۔

ان کا مزید کہنا تھا کہ پی ٹی آئی والے ضمنی الیکشن سے بائیکاٹ پر بھی خوش نہیں ہیں، پی ٹی آئی اراکین بند گلی سے بند ڈبے میں نہیں جانا چاہتے، تسلسل یہی ہے کہ اسمبلی اپنی مدت پوری کرے۔