سائفر کیس ،عمران خان کا ٹرائل جیل میں ہی ہوگا

?️ 3 اکتوبر 2023

اسلام آباد: (سچ خبریں) آفیشل سیکرٹ ایکٹ عدالت میں سائفر کیس کی سماعت کا معاملہ، چیئرمین پی ٹی آئی عمران خان کا ٹرائل اڈیالہ جیل ہو گا ۔ سائفر کیس کی سماعت خصوصی عدالت کے جج ابوالحسنات ذوالقرنین کریں گے ۔ وزرات قانون نے چیئرمین پی ٹی آئی کے اڈیالہ جیل میں ٹرائل کا نوٹیفیکیشن جاری کر دیا ۔ جج ابوالحسنات ذوالقرنین کی جانب سے چیئرمین پی ٹی آئی کو لاحق سیکورٹی خدشات پر خط   لکھا گیا تھا۔

عدالت نے خط کے ذریعے وزارتِ قانون سے قانونی رائے طلب کر لی۔ خط میں کہا گیا کہ چیئرمین پی ٹی آئی عمران خان کو عدالت لانے کیلئے سکیورٹی کا کوئی خدشہ تو نہیں۔ عمران خان اہم شخصیت اور سیاسی جماعت کے سربراہ ہیں،چیئرمین پی ٹی آئی کی سکیورٹی بھی عدالت کے مدِ نظر ہے۔

جج ابو الحسنات ذوالقرنین کی جانب سے خط میں کہا گیا کہ اگر سکیورٹی خدشات نہیں تو سائفر گمشدگی کیس کی سماعت آفیشل سیکرٹ ایکٹ عدالت میں ہی ہو گی۔

یاد رہے کہ عدالت نے سائفر کیس میں عمران خان اور شاہ محمود قریشی کو پیش کرنے کی ہدایت کر رکھی ہے۔ عدالت نے چیئرمین پی ٹی آئی عمران خان اور وائس چیئرمین پی ٹی آئی شاہ محمود قریشی کو 4 اکتوبر کیلئے نوٹس جاری کیا۔ جج ابو الحسنات ذوالقرنین نے عمران خان اور شاہ محمود قریشی کو پیش کرنے کے احکامات جاری کئے۔ جبکہ اس سے قبل ایف آئی اے نے سائفر کیس کا چالان آفیشل سیکرٹ ایکٹ کے تحت قائم خصوصی عدالت میں جمع کروایا تھا۔

چالان میں چیئرمین پی ٹی آئی عمران خان اور وائس چیئرمین پی ٹی آئی شاہ محمود قریشی کو قصور وار قرار دیا گیا۔ ایف آئی اے نے عمران خان اور شاہ محمود قریشی کو ٹرائل کر کے سزا دینے کی استدعا کی۔ ذرائع نے بتایا کہ اسد عمر ایف آئی اے کی ملزمان کی فہرست میں شامل نہیں ہیں۔